ایشیا کپ 2025 کے لیے یو اے ای میں انعقاد کی تجویز
ڈھاکا میں ایشین کرکٹ کونسل (ACC) کے سالانہ اجلاس کے دوران یہ تجویز سامنے آئی ہے کہ ایشیا کپ 2025 کا آغاز 5 سے 10 ستمبر کے درمیان متحدہ عرب امارات میں کیا جائے۔ ذرائع کے مطابق ایونٹ کے میچز دبئی اور ابو ظبی کے اسٹیڈیمز میں ہوں گے۔
8 ٹیمیں ایکشن میں ہوں گی
ایونٹ میں پاکستان اور بھارت سمیت کل آٹھ ایشیائی ٹیمیں شریک ہوں گی۔ ایشیا کپ کے دوران شائقین کو ایک بار پھر روایتی حریف پاکستان اور بھارت کے درمیان سنسنی خیز مقابلے دیکھنے کو مل سکتے ہیں، جو اس ایونٹ کا سب سے بڑا مرکز نگاہ ہوتے ہیں۔
سیاست سے پاک کرکٹ کا عزم
اجلاس کے بعد میڈیا سے گفتگو کرتے ہوئے اے سی سی کے صدر محسن نقوی نے بتایا کہ کونسل کے تمام 25 ارکان اجلاس میں شریک ہوئے اور متفقہ طور پر فیصلہ کیا گیا کہ کرکٹ کو سیاست سے پاک رکھا جائے گا۔ انہوں نے کہا، “ہم سب کو مل کر صرف کرکٹ کے فروغ کے لیے کام کرنا ہے۔”
شیڈول بھارت سے متوقع، اعلان جلد
محسن نقوی کے مطابق ایشیا کپ 2025 کا باضابطہ شیڈول بھارت کی جانب سے بھیجا جانا باقی ہے۔ ان کا کہنا تھا، “شیڈول موصول ہونے کے بعد ہی حتمی اعلان کیا جائے گا۔” انہوں نے مزید تصدیق کی کہ ایشیا کپ سے قبل پاکستان، افغانستان اور یو اے ای کے درمیان ایک تین ملکی کرکٹ سیریز بھی منعقد کی جائے گی۔
مزید پڑھیں
