پنجاب میں مارکیٹس اور تفریحی مقامات کب سے کھلیں گے؟ اعلان ہوگیا

لاہور:
پنجاب میں اسموگ کی شدت میں کمی کے بعد تفریحی سرگرمیوں پر عائد پابندیوں کو نرم کرتے ہوئے تمام تفریحی مقامات کو دوبارہ کھولنے کی اجازت دے دی گئی ہے۔ ڈی جی ماحولیات کی جانب سے جاری کردہ نوٹیفکیشن کے مطابق، صوبے بھر کے تفریحی مراکز، بشمول پارکس، چڑیا گھر، کھیل کے میدان، اور آؤٹ ڈور اسپورٹس کی سرگرمیاں کل سے بحال ہوں گی۔ ان تمام مقامات کو رات 8 بجے تک کھلا رکھنے کی ہدایت دی گئی ہے۔ اس کے ساتھ ساتھ مختلف فیسٹیولز اور نمائشوں کے انعقاد کی بھی اجازت دے دی گئی ہے۔

مارکیٹس اور بنیادی اشیاء کی دستیابی کے نئے اوقات
لاہور، ملتان، فیصل آباد، اور گوجرانوالہ سمیت مختلف شہروں میں مارکیٹس کو بھی رات 8 بجے تک کھلا رکھنے کی اجازت دے دی گئی ہے۔ ہفتہ اور اتوار کو بھی مارکیٹس کے لیے یہی وقت مقرر کیا گیا ہے۔ تاہم فارمیسز، تندور، ڈیپارٹمنٹل اور گروسری اسٹورز جیسی بنیادی ضرورت کی دکانیں ان اوقات سے مستثنیٰ ہوں گی اور بیکریوں کو رات 8 بجے کے بعد بھی کام جاری رکھنے کی اجازت دی گئی ہے۔ نوٹیفکیشن کے مطابق، یہ نرمی دکانوں، شاپنگ مالز، اور مارکیٹس پر لاگو ہوگی تاکہ شہریوں کو آسانی اور سہولت فراہم کی جا سکے۔