وزیراعلیٰ ہاؤس پشاور میں اجلاس
وزیراعلیٰ ہاؤس پشاور میں پاکستان تحریک انصاف سے تعلق رکھنے والے خیبرپختونخوا اسمبلی کے ارکان کا اہم اجلاس منعقد ہوا۔ اجلاس کی صدارت پارٹی کی اعلیٰ قیادت نے کی۔ جس میں موجودہ سیاسی صورتحال اور آئندہ حکمتِ عملی پر تفصیلی غور کیا گیا۔ ذرائع کے مطابق اجلاس کے دوران ارکانِ اسمبلی سے نامزد وزیراعلیٰ سہیل آفریدی کی حمایت کے لیے اعتماد کا اظہار کروایا گیا اور انہیں ووٹ دینے کا حلف لیا گیا۔
اجلاس میں پارٹی نظم و ضبط، اتحاد اور یکجہتی پر زور دیا گیا۔ جبکہ ارکان کو ہدایت کی گئی کہ وہ آئندہ وزیراعلیٰ کے انتخاب کے عمل میں پارٹی فیصلے کے مطابق ووٹنگ کو یقینی بنائیں۔ ذرائع کا کہنا ہے کہ قیادت نے واضح کیا کہ تمام فیصلے مشاورت اور پارٹی مفاد کو سامنے رکھتے ہوئے کیے جا رہے ہیں۔ اجلاس خوشگوار ماحول میں اختتام پذیر ہوا اور ارکان نے قیادت پر مکمل اعتماد کا اظہار کیا۔
تمام اراکین کی موجودگی
ذرائع کا کہنا ہے۔ کہ اس وقت تمام ارکان وزیراعلیٰ ہاؤس میں موجود ہیں۔ صوبائی صدر جنید اکبر کے مطابق وہ تمام 9 ارکان جو بیرون ملک تھے، واپس پہنچ چکے ہیں۔ اور اب پی ٹی آئی کے تمام ارکان بانیِ تحریک انصاف کے نامزد وزیراعلیٰ کو دو تہائی اکثریت سے منتخب کرائیں گے۔
سہیل آفریدی کا بیان
نامزد وزیراعلیٰ سہیل آفریدی نے کہا۔ کہ وہ الیکشن جیتنے کے بعد اسمبلی کے فلور پر تقریر کریں گے اور ان کی تقریر بانی پی ٹی آئی کی پالیسی کے عین مطابق ہوگی۔ ان کا کہنا تھا۔ کہ پارٹی نظم و ضبط کے مطابق فیصلے کیے جائیں گے اور سب کا فوکس خیبرپختونخوا کی ترقی پر ہوگا۔
مزید پڑھیں
دونوں استعفوں پر میرے دستخط موجود، علی امین کا گورنر کو جواب
