واشنگٹن میں غزہ امن بورڈ اجلاس، وزیراعظم کی شرکت متوقع
نائب وزیراعظم اور وزیر خارجہ اسحاق ڈار نے کہا ہے کہ وزیراعظم شہباز شریف واشنگٹن میں ہونے والے غزہ امن بورڈ اجلاس میں شرکت کریں گے اور امریکی صدر کے امن منصوبے کی حمایت کریں گے۔ انہوں نے بتایا کہ وزیراعظم امریکا پہنچ چکے ہیں جہاں ان کی امریکی قیادت اور دیگر عالمی رہنماؤں سے اہم ملاقاتیں متوقع ہیں۔
اقوام متحدہ کی سلامتی کونسل میں غزہ کی صورتحال پر اظہار خیال
اقوام متحدہ کی سلامتی کونسل کے اجلاس سے خطاب کرتے ہوئے اسحاق ڈار نے غزہ میں اسرائیلی کارروائیوں اور جنگ بندی کی مبینہ خلاف ورزیوں پر تفصیلی روشنی ڈالی۔ انہوں نے کہا کہ اسرائیلی جارحیت بین الاقوامی قوانین کی خلاف ورزی ہے اور پاکستان غزہ میں جنگ بندی کی خلاف ورزیوں کی شدید مذمت کرتا ہے۔
جنگ بندی کا احترام اور بین الاقوامی قوانین کی پاسداری پر زور
نائب وزیراعظم نے زور دیا کہ جنگ بندی کا مکمل احترام کیا جانا چاہیے اور فوری طور پر کشیدگی کم کرنے کے اقدامات کیے جائیں۔ انہوں نے کہا کہ پائیدار امن کے لیے باہمی احترام اور سنجیدہ سفارت کاری ناگزیر ہے۔
فلسطینیوں کے حق خودارادیت کے بغیر امن ممکن نہیں
اسحاق ڈار نے واضح کیا کہ فلسطینی اتھارٹی کا مرکزی کردار ہر صورت میں تسلیم کیا جانا چاہیے اور فلسطینیوں کے حق خودارادیت کا احترام کیے بغیر کوئی بھی حل قابل عمل نہیں ہوگا۔ انہوں نے غزہ سے فلسطینیوں کی بے دخلی کے کسی بھی اقدام کی سخت الفاظ میں مذمت بھی کی۔
مزید پڑھیں
وزیراعلیٰ پنجاب کی رمضان کی مبارکباد، ضرورت مندوں کیلئے دعا اور خیرات کی اپیل
