رمضان امن، برکت اور استحکام کا پیغام لے کر آئے
وزیراعلیٰ پنجاب مریم نواز نے ماہِ رمضان کی آمد پر عالمِ اسلام کو مبارکباد دیتے ہوئے دعا کی ہے کہ یہ مقدس مہینہ برکت، امن اور استحکام کا باعث بنے۔ لاہور سے جاری بیان میں انہوں نے کہا کہ رمضان المبارک اللہ تعالیٰ کی رضا، رحمت اور بخشش حاصل کرنے کا سنہری موقع فراہم کرتا ہے۔
سحری، افطار اور تراویح میں ملک کی سلامتی کیلئے خصوصی دعاؤں کی اپیل
وزیراعلیٰ نے شہریوں سے اپیل کی کہ وہ سحری، افطار اور تراویح کے موقع پر ملک و قوم کی سلامتی، ترقی اور خوشحالی کے لیے خصوصی دعائیں کریں۔ انہوں نے کہا کہ قرآن پاک میں ارشاد ہے کہ چھوٹی سے چھوٹی نیکی کا بھی اجر ملتا ہے اور رمضان نیکیوں کا موسمِ بہار ہے۔
ضرورت مندوں کیلئے دسترخوان کھلے رکھنے کی ہدایت
مریم نواز نے صاحبِ حیثیت افراد سے اپیل کی کہ وہ سحری اور افطار کے اوقات میں ضرورت مندوں کے لیے اپنے دسترخوان کھلے رکھیں۔ انہوں نے کہا کہ رمضان ہمیں ہمدردی، شکرگزاری اور سخاوت کا درس دیتا ہے، اور ہمیں کمزور طبقات کی مدد کرنی چاہیے۔
رمضان گارڈین کارڈ کے تحت 40 لاکھ خاندانوں کو امداد
وزیراعلیٰ نے بتایا کہ حکومتِ پنجاب کی جانب سے رمضان گارڈین کارڈ پروگرام کے تحت 40 لاکھ خاندانوں کو 10 ہزار روپے فی خاندان فراہم کیے جا رہے ہیں۔ انہوں نے کہا کہ راشن پوائنٹس پر قطاروں کے خاتمے کیلئے اقدامات کیے گئے ہیں اور مستحقین تک امداد براہِ راست پہنچائی جا رہی ہے۔
پنجاب بھر میں سحری و افطار دسترخوان اور رمضان بازار
مریم نواز کے مطابق پنجاب کے 147 اضلاع میں 300 سے زائد مقامات پر سحری و افطار کے دسترخوان کا اہتمام کیا گیا ہے۔ مزید برآں، صوبے بھر کے سہولت بازاروں کو رمضان بازاروں میں تبدیل کر دیا گیا ہے تاکہ شہریوں کو اشیائے ضروریہ مناسب قیمتوں پر دستیاب ہوں۔
مزید پڑھیں
متحدہ عرب امارات نے رمضان المبارک میں قیدیوں کی رہائی کا اعلان کیا
