اسلام آباد میں 31 جولائی کو آل پارٹیز کانفرنس
اپوزیشن اتحاد نے 31 جولائی 2025 کو اسلام آباد میں آل پارٹیز کانفرنس بلانے کا اعلان کر دیا ہے۔ تحریک تحفظ آئین پاکستان کے سربراہ محمود خان اچکزئی نے جمعرات کو پریس کانفرنس میں بتایا کہ یہ اتحاد آئین کی بالادستی اور عوامی حقِ نمائندگی کے لیے سرگرم ہے۔
حکومت پر سخت تنقید، عوامی طاقت سے تبدیلی کا عندیہ
محمود خان اچکزئی نے کہا کہ الیکشن کمیشن کو غیر جانب دار بنایا جائے اور عوامی مینڈیٹ کو تسلیم کیا جائے۔ انہوں نے حکومت پر تنقید کرتے ہوئے کہا کہ جس پارٹی نے انتخابات جیتے، اس کے قائدین کو جیل میں قید رکھا گیا اور ان کی قیادت سے ملاقات بھی نہیں ہونے دی جا رہی۔
جبر کے خلاف پرامن آئینی تحریک کی وضاحت
سیکرٹری جنرل تحریک انصاف سلمان اکرم راجا نے کہا کہ تحریک تحفظ آئین پاکستان ایک آئینی اور نظریاتی جدوجہد ہے، اس کا مقصد کوئی تصادم یا توڑ پھوڑ نہیں۔ انہوں نے کہا کہ بانی پی ٹی آئی کا جیل ٹرائل بغیر وکلاء اور اہلِ خانہ کے ہو رہا ہے جو انصاف کے تقاضوں کے خلاف ہے۔
مصطفیٰ نواز کھوکھر کا مؤقف
اپوزیشن رہنما مصطفیٰ نواز کھوکھر نے کہا کہ یہ تحریک حکومتی جبر سے نجات کے لیے ہے، جس کا پہلا قدم آل پارٹیز کانفرنس ہوگا۔ اس کانفرنس میں تمام متاثرہ حلقوں اور طبقات کو مدعو کیا جائے گا۔
مزید پڑھیں
ملتان بورڈ کے میٹرک امتحان میں رکشہ ڈرائیور کے بیٹے نے میدان مار لیا
