بلوچستان کے اضلاع کچھی اور خاران میں سکیورٹی فورسز نے دو انٹیلی جنس بیسڈ آپریشنز کے دوران 17 دہشتگردوں کو ہلاک کردیا، جبکہ فائرنگ کے تبادلے میں پاک فوج کا ایک جوان شہید ہوگیا۔
پاک فوج کے شعبہ تعلقات عامہ (آئی ایس پی آر) کے مطابق یہ کارروائیاں یکم نومبر 2026 کو دہشتگردوں کی موجودگی کی اطلاعات پر کی گئیں۔ آپریشنز کے دوران
اسلحہ اور گولہ بارود بھی برآمد کیا گیا۔
کچھی میں سکیورٹی فورسز کی کارروائی، 10 دہشتگرد ہلاک
آئی ایس پی آر کے مطابق پہلا آپریشن ضلع کچھی کے علاقے سنی میں کیا گیا، جہاں دہشتگرد سڑک پر رکاوٹ قائم کرنے کی کوشش کررہے تھے۔
سکیورٹی فورسز نے بروقت کارروائی کرتے ہوئے دہشتگردوں کی کوشش ناکام بنادی، جس کے نتیجے میں 10 دہشتگرد ہلاک ہوگئے۔ کارروائی کے دوران اسلحہ اور گولہ بارود بھی برآمد کیا گیا۔
خاران میں دہشتگردوں کا ٹھکانہ تباہ، 7 ہلاک
آئی ایس پی آر کے مطابق دوسرا آپریشن ضلع خاران میں کیا گیا، جہاں سکیورٹی فورسز نے دہشتگردوں کے ایک ٹھکانے کو نشانہ بنایا۔
کارروائی کے دوران شدید فائرنگ کا تبادلہ ہوا، جس کے نتیجے میں 7 دہشتگرد مارے گئے۔ اس آپریشن میں بھی اسلحہ اور گولہ بارود برآمد کیا گیا۔
سپاہی حکمت اللہ نے جام شہادت نوش کیا
آئی ایس پی آر کے مطابق خاران میں آپریشن کے دوران شدید فائرنگ کے تبادلے میں پاک فوج کے سپاہی حکمت اللہ شہید ہوگئے۔
شہید سپاہی حکمت اللہ کی عمر 25 سال تھی اور ان کا تعلق خیبر پختونخوا کے ضلع کرک سے تھا۔ انہوں نے دہشتگردوں کے خلاف کارروائی کے دوران بہادری سے مقابلہ کرتے ہوئے اپنی جان وطن پر قربان کردی۔
علاقے میں کلیئرنس آپریشن جاری
ترجمان پاک فوج کے مطابق دونوں کارروائیوں کے بعد متعلقہ علاقوں میں کلیئرنس اور سرچ آپریشنز جاری ہیں تاکہ وہاں موجود کسی بھی دوسرے دہشتگرد کا خاتمہ کیا جاسکے۔
آئی ایس پی آر نے کہا ہے کہ ملک سے دہشتگردی کے خاتمے کے لیے سکیورٹی فورسز کی کارروائیاں عزمِ استحکام کے تحت پوری رفتار سے جاری رہیں گی۔
صدر اور وزیراعظم کا سکیورٹی فورسز کو خراج تحسین
صدر مملکت آصف علی زرداری اور وزیراعظم شہباز شریف نے بلوچستان میں کامیاب کارروائیوں پر سکیورٹی فورسز کو خراج تحسین پیش کیا۔
صدر مملکت نے 17 دہشتگردوں کی ہلاکت پر فورسز کی پیشہ ورانہ صلاحیتوں کو سراہا اور شہید سپاہی حکمت اللہ کی قربانی کو خراج عقیدت پیش کیا۔ وزیراعظم نے بھی شہید اہلکار کے اہل خانہ سے تعزیت کرتے ہوئے دہشتگردی کے مکمل خاتمے کے عزم
کا اعادہ کیا۔
مزید پڑھیں
کراچی: بھرتی کے لیے جعلی میڈیکل فٹنس سرٹیفکیٹس فروخت کرنے والا شخص گرفتار
