ایران سے مذاکرات طے پا گئے
امریکی صدر ڈونلڈ ٹرمپ اور اسرائیلی وزیر اعظم بینجمن نیتن یاہو کے درمیان وائٹ ہاؤس میں ہونے والی ایک غیر رسمی عشائیہ ملاقات میں ایران سے متعلق اہم پیشرفت سامنے آئی ہے۔ اس ملاقات کے دوران دونوں رہنماؤں نے ایران کے ساتھ مذاکرات کا وقت طے پانے کی تصدیق کی۔
ایران کو پرامن ترقی کا موقع دینا چاہتے ہیں: ٹرمپ
صدر ٹرمپ کا کہنا تھا کہ ہم ایران کو پرامن انداز میں ترقی کا موقع دینا چاہتے ہیں، اور مناسب وقت پر اس پر عائد پابندیاں بھی ہٹانے کا فیصلہ کیا جائے گا۔ ان کا کہنا تھا کہ امریکہ سفارتی حل کو ترجیح دے رہا ہے اور ایرانی ایٹمی تنصیبات کو پہلے ہی ناکارہ بنا دیا گیا ہے۔
ایران میں حکومت کی تبدیلی عوام کا فیصلہ ہوگا: نیتن یاہو
ایرانی حکومت کی تبدیلی سے متعلق سوال کے جواب میں اسرائیلی وزیر اعظم نیتن یاہو کا کہنا تھا کہ ایران میں حکومت بدلنے کا فیصلہ صرف اور صرف ایرانی عوام کو کرنا ہے۔ ان کے مطابق خطے میں امن اور استحکام ہی اسرائیل کا اولین مقصد ہے۔
پاکستان اور بھارت کی کشیدگی کا خاتمہ ہماری بڑی کامیابی: ٹرمپ
صدر ٹرمپ نے ایک بار پھر پاکستان اور بھارت کے درمیان کشیدگی کا ذکر کرتے ہوئے کہا کہ دونوں ممالک ایٹمی طاقتیں ہیں اور ان کے درمیان جنگ کا رک جانا دنیا کے لیے ممکنہ تباہی سے بچاؤ تھا۔ ہم نے دونوں ملکوں کو جنگ کے بجائے تجارت کی پیشکش کی ہے، اور یہ ہماری بڑی کامیابی ہے، انہوں نے دعویٰ کیا۔
اسرائیل-حماس جنگ ختم ہونے کی امید
صدر ٹرمپ نے کہا کہ انہیں امید ہے کہ اسرائیل اور حماس کے درمیان جاری جنگ اب ختم ہو چکی ہے۔ یہ ہم سب کے لیے ایک بڑی مشترکہ کامیابی ہے۔ خطے کے تمام اہم ممالک اس کشیدگی کو کم کرنے کے لیے ہمارے ساتھ کھڑے ہیں، ٹرمپ نے کہا۔
روس یوکرین تنازع اور بھارت سے تجارتی معاہدے پر گفتگو
صدر ٹرمپ نے روس کے صدر ولادیمیر پیوٹن پر بھی تنقید کی اور کہا کہ یوکرین پر جاری حملے باعثِ تشویش ہیں۔ ہم یوکرین کے دفاع کے لیے مزید ہتھیار فراہم کریں گے۔ انہوں نے بھارت کے ساتھ تجارتی معاہدے کا ذکر کرتے ہوئے کہا کہ ہم بھارت کے ساتھ اہم تجارتی معاہدہ طے کرنے کے قریب ہیں، اور کچھ ممالک کے لیے ٹیرف ایڈجسٹمنٹ پر بھی غور کیا جا رہا ہے۔
امریکا اور اسرائیل کو شاندار فتح ملی ہے: ٹرمپ
صدر ٹرمپ نے اپنے اختتامی بیان میں کہا کہ امریکہ اور اسرائیل کو حالیہ اقدامات کے نتیجے میں ایک شاندار فتح حاصل ہوئی ہے۔ ہم سفارتی، معاشی اور عسکری سطح پر مضبوط تر ہو کر اُبھرے ہیں۔
مزید پڑھیں
