نواز شریف کی جیل منتقلی کی خبر بے بنیاد
سینئر صحافی اور گروپ ایڈیٹر ایکسپریس ایاز خان نے کہا ہے کہ نواز شریف کی اڈیالہ جیل منتقلی کی خبر بالکل بے بنیاد ہے، جبکہ آصف علی زرداری کے بارے میں تھوڑا سا امکان ہو سکتا ہے۔
مخصوص نشستوں کے بعد پیپلزپارٹی کی پوزیشن کمزور
ایاز خان نے ایکسپریس نیوز کے پروگرام ایکسپرٹس میں گفتگو کرتے ہوئے کہا کہ پیپلزپارٹی پہلے بڑی آرام سے بلیک میل کر لیتی تھی، لیکن مخصوص نشستوں کی تقسیم کے بعد یہ پوزیشن بھی ختم ہو گئی ہے کیونکہ حکومت کو دو تہائی اکثریت حاصل ہو چکی ہے۔
صدر کے عہدے سے متعلق قیاس آرائیاں
تجزیہ کار فیصل حسین نے کہا: صدر صاحب رہیں یا جائیں، اس سے کوئی فرق نہیں پڑتا۔ اصل فیصلہ اُنہی کا ہے جنہوں نے اُنہیں صدر بنایا ہے۔ ان کا مزید کہنا تھا کہ صدر صاحب بھی فارم 47 کے بینیفشری ہیں، صرف مسلم لیگ (ن) ہی نہیں بلکہ پیپلزپارٹی بھی اسی طرح مستفید ہوئی ہے۔
سیاسی افواہوں میں صداقت؟
تجزیہ کار نوید حسین نے تبصرہ کرتے ہوئے کہا اگر دھواں ہے تو آگ بھی ہو سکتی ہے۔ یہ کہنا کہ افواہیں ہیں، درست نہیں لگتا کیونکہ ماضی میں بھی چھبیسویں آئینی ترمیم کو حکومت آخر وقت تک جھٹلاتی رہی لیکن پھر راتوں رات ترمیم لانے کی کوشش کی گئی۔
دو تہائی اکثریت کی حقیقت؟
تجزیہ کار عامر الیاس رانا نے کہا: یہ دعویٰ کہ حکومت کے پاس دو تہائی اکثریت ہے، درست نہیں۔ پی ایم ایل (ن) کے پاس سادہ اکثریت بھی پیپلزپارٹی کے بغیر حاصل نہیں ہو سکتی۔ انہوں نے واضح کیا کہ دو تہائی اکثریت اتحادیوں کو ملا کر ہی ممکن ہوئی ہے۔
صدر کی تبدیلی کی افواہیں پرانی ہو چکیں
تجزیہ کار محمد الیاس نے کہا: صدر زرداری کی طبیعت خراب ہونے کے وقت کچھ نام گردش میں تھے، لیکن اب کوئی تبدیلی زیر غور نہیں۔ میڈیا میں جو باتیں ہو رہی ہیں وہ پرانی افواہیں ہیں، موجودہ صورتحال میں اتحاد بدستور برقرار ہے۔
مزید پڑھیں
