امریکا کی 5 شرائط اور ایران کے جوابی مطالبات
وفاقی وزیر داخلہ محسن نقوی نے تہران میں ایرانی صدر مسعود پزشکیان سے اہم ملاقات کی، جس میں دوطرفہ تعلقات، علاقائی صورتحال اور ایران و امریکا کے درمیان جاری کشیدگی پر تفصیلی گفتگو کی گئی۔ ملاقات تقریباً 90 منٹ جاری رہی اور اس میں خطے میں امن و استحکام کے لیے سفارتی کوششوں پر بھی تبادلہ خیال ہوا۔
ایرانی قیادت اور پاکستانی وفد کی اہم ملاقات
صدارتی محل میں ہونے والی اس ملاقات میں ایرانی وزیر خارجہ عباس عراقچی اور ایرانی وزیر داخلہ اسکندر مومنی بھی شریک تھے۔ ذرائع کے مطابق پاکستانی وفد نے ایرانی قیادت کے ساتھ مختلف علاقائی معاملات اور ممکنہ سفارتی پیش رفت پر بات چیت کی۔
اسلامی ممالک کے اتحاد پر زور
ایرانی صدر مسعود پزشکیان نے اس موقع پر کہا کہ اسلامی ممالک کے درمیان اتحاد جتنا مضبوط ہوگا، بیرونی جارحیت کے امکانات اتنے ہی کم ہوں گے۔ انہوں نے خطے کے ہمسایہ ممالک پر زور دیا کہ وہ باہمی تعاون اور اعتماد کو فروغ دیں تاکہ خطے میں بیرونی مداخلت کو ناکام بنایا جا سکے۔
ایران اور امریکا کے درمیان مذاکراتی ڈیڈلاک
رپورٹس کے مطابق محسن نقوی کا دورہ ایران اور امریکا کے درمیان جاری ڈیڈلاک ختم کرنے کی سفارتی کوششوں کا حصہ سمجھا جا رہا ہے۔ ایرانی خبر رساں اداروں کے مطابق امریکا نے مذاکرات کے لیے ایران کے سامنے پانچ اہم شرائط رکھی ہیں۔
امریکا کی جانب سے عائد کی گئی 5 شرائط
ذرائع کے مطابق امریکا کی شرائط میں شامل ہیں ایران کو جنگی ہرجانہ ادا نہیں کیا جائے گا 400 کلوگرام افزودہ یورینیم امریکا کے حوالے کیا جائے صرف ایک ایرانی جوہری تنصیب برقرار رکھی جائے منجمد ایرانی اثاثوں کا مکمل حصہ واپس نہیں کیا جائے گا مذاکرات تمام محاذوں پر جنگ بندی سے مشروط ہوں گے
ایران کے جوابی مطالبات کیا ہیں؟
ایران نے بھی مذاکرات کے لیے اپنی پانچ شرائط پیش کی ہیں، جن میں تمام محاذوں پر جنگ کا خاتمہ ایران پر عائد پابندیوں کا خاتمہ منجمد اثاثوں کی واپسی جنگی ہرجانے کی ادائیگی آبنائے ہرمز پر ایران کی خودمختاری کو تسلیم کرنا شامل ہیں۔
ٹرمپ کا سخت بیان
امریکی صدر ڈونلڈ ٹرمپ نے اپنے حالیہ بیان میں کہا کہ ایران کے پاس وقت کم ہے اور اسے جلد فیصلہ کرنا ہوگا۔ انہوں نے سوشل میڈیا پر ایک تصویر بھی شیئر کی جس پر ’’طوفان سے پہلے کی خاموشی‘‘ لکھا ہوا تھا، جسے عالمی سطح پر اہم اشارہ سمجھا جا رہا ہے۔
ایران کا سخت ردِعمل
ایرانی مسلح افواج کے ترجمان ابوالفضل شکاری نے خبردار کیا کہ اگر دوبارہ حملہ کیا گیا تو ایران کا ردعمل پہلے سے زیادہ سخت اور حیران کن ہوگا۔ ان کا کہنا تھا کہ کسی بھی نئی جارحیت کا جواب شدید حملوں کی صورت میں دیا جائے گا۔
آبنائے ہرمز اور عالمی معیشت پر خدشات
ماہرین کے مطابق اگر آبنائے ہرمز میں کشیدگی برقرار رہی تو اس کے عالمی معیشت پر سنگین اثرات مرتب ہو سکتے ہیں۔ امریکی محکمہ خارجہ کے سابق عہدیدار ایلن آئر کے مطابق آبنائے ہرمز کی بندش جتنی طویل ہوگی، عالمی معاشی بحران کے خطرات اتنے ہی بڑھ جائیں گے۔
مزید پڑھیں
پاکستان میں تعلیمی بحران، ڈھائی کروڑ بچے تعلیم سے محروم پنجاب میں تعداد زیادہ
