شدید سردی اور بےگھری
اسرائیلی بمباری کے باعث گھروں سے محروم فلسطینی خاندان شدید سرد موسم کا سامنا کر رہے ہیں، جہاں بنیادی سہولیات کی کمی انسانی المیے کو مزید سنگین بنا رہی ہے۔
نومولود کی ہلاکت
غزہ کی وزارت صحت کے مطابق ناقابلِ برداشت سردی کے باعث ایک اور نومولود جان سے ہاتھ دھو بیٹھا۔ حکام نے خبردار کیا ہے کہ رہائش، ایندھن اور حفاظتی سہولیات کی عدم دستیابی سے بچوں اور بزرگوں کی زندگیاں شدید خطرے میں ہیں۔
یونیسف کی تشویش
اقوام متحدہ کے ادارے یونیسف نے غزہ میں بچوں کی بگڑتی صورتحال پر شدید تشویش کا اظہار کیا ہے۔ یونیسف کے مطابق بچے ایسے خیموں میں رہنے پر مجبور ہیں جو بارش کے پانی سے بھر چکے ہیں اور انہیں خشک رکھنا تقریباً ناممکن ہو گیا ہے۔
بیماریوں کا بڑھتا خطرہ
یونیسف کے کمیونیکیشن چیف جوناتھن کرکس نے بیماریوں کے پھیلاؤ کے خدشے سے خبردار کرتے ہوئے کہا کہ محدود کپڑے اور بھیگے کمبل بچوں کی صحت کے لیے شدید خطرہ بن چکے ہیں۔
ایمنسٹی انٹرنیشنل کا ردعمل
ایمنسٹی انٹرنیشنل نے کہا ہے کہ حالیہ اموات کو محض خراب موسم کا نتیجہ قرار نہیں دیا جا سکتا بلکہ یہ اسرائیل کی جانب سے پناہ اور مرمت کے سامان کی فراہمی روکنے کا نتیجہ ہیں۔
شاتی کیمپ میں چھت گرنے کا واقعہ
غزہ کے شاتی پناہ گزین کیمپ میں شدید طوفان کے باعث متاثرہ گھر کی چھت گر گئی، جس کے نتیجے میں 2 بچوں سمیت 6 افراد ملبے تلے دب گئے، تاہم ریسکیو اہلکاروں نے تمام افراد کو بحفاظت نکال لیا۔
مزید پڑھیں
فرانس میں سائبر سیکیورٹی الرٹ، وزارتِ داخلہ کی ویب سائٹس متاثر
