وزیراعظم شہباز شریف نے نوجوانوں کو کاروبار اور زرعی سرگرمیوں کے لیے مالی معاونت فراہم کرنے کی غرض سے یوتھ بزنس اور ایگریکلچر لون اسکیموں کے تحت زیادہ سے زیادہ قرض کی حد 75 لاکھ روپے سے بڑھا کر ڈھائی کروڑ روپے کردی ہے۔
وزیراعظم نے یہ فیصلہ اتوار کو اسکیموں پر عمل درآمد اور پیش رفت کا جائزہ لینے کے لیے منعقدہ اجلاس کی صدارت کرتے ہوئے کیا۔ اس موقع پر قرضوں کی کم از کم عمر کی حد 21 سال سے کم کرکے 18 سال کرنے اور مجموعی قرضوں کا 30 فیصد خواتین کے لیے مختص کرنے کی بھی ہدایت کی گئی۔
قرض کی زیادہ سے زیادہ حد 2 کروڑ 50 لاکھ روپے مقرر
وزیراعظم شہباز شریف نے متعلقہ حکام کو ہدایت کی کہ یوتھ بزنس اور ایگریکلچر لون اسکیموں کے تحت نوجوانوں کو اب زیادہ سے زیادہ ڈھائی کروڑ روپے تک قرض فراہم کیا جائے۔
اس سے قبل ان اسکیموں کے تحت انفرادی قرض کی زیادہ سے زیادہ حد 75 لاکھ روپے تھی۔ وزیراعظم نے ہدایت کی کہ قرضوں کی واپسی کے لیے آسان اقساط کا انتظام کیا جائے تاکہ نوجوان اپنے کاروبار شروع کرنے اور زرعی منصوبوں کو وسعت دینے کے قابل ہوسکیں۔
قرض حاصل کرنے کی کم از کم عمر 18 سال کردی گئی
اجلاس میں نوجوانوں کے لیے قرض حاصل کرنے کی کم از کم عمر 21 سال سے کم کرکے 18 سال کرنے کا فیصلہ بھی کیا گیا۔
اس اقدام کا مقصد کم عمر نوجوانوں کو بھی کاروبار شروع کرنے اور زرعی شعبے میں اپنی سرگرمیاں بڑھانے کے مواقع فراہم کرنا ہے، تاکہ وہ ابتدائی عمر ہی سے معاشی طور پر خودمختار بن سکیں۔
30 فیصد قرض خواتین کے لیے مختص کرنے کی ہدایت
وزیراعظم نے یوتھ بزنس اور ایگریکلچر لون اسکیموں کے تحت فراہم کیے جانے والے مجموعی قرضوں کا 30 فیصد خواتین کے لیے مختص کرنے کی ہدایت بھی کی۔
اس فیصلے کا مقصد خواتین کی معاشی خودمختاری کو فروغ دینا اور انہیں کاروباری سرگرمیوں میں زیادہ مؤثر کردار ادا کرنے کے مواقع فراہم کرنا ہے۔
رواں مالی سال کے لیے 292 ارب روپے مختص
اجلاس کو بتایا گیا کہ رواں مالی سال 2026-27 کے دوران نوجوانوں کو قرض فراہم کرنے کے لیے 292 ارب روپے مختص کیے گئے ہیں۔ اس رقم سے تقریباً 2 لاکھ 66 ہزار 700 نوجوان مستفید ہوسکیں گے۔
بریفنگ کے مطابق جنوری 2023 سے اب تک 5 لاکھ 81 ہزار 341 نوجوانوں کو مجموعی طور پر 313 ارب 90 کروڑ روپے کے قرضے فراہم کیے جاچکے ہیں۔
سمیڈا کو نوجوانوں کی معاونت کی ہدایت
وزیراعظم نے سمال اینڈ میڈیم انٹرپرائزز ڈویلپمنٹ اتھارٹی (SMEDA) کو ہدایت کی کہ قرض حاصل کرنے کے خواہش مند نوجوانوں کو کاروبار شروع کرنے، مشاورت اور تکنیکی معاونت سمیت ہر ممکن سہولت فراہم کی جائے۔
انہوں نے متعلقہ حکام کو ملک بھر میں آگاہی مہم شروع کرنے کی بھی ہدایت کی، تاکہ زیادہ سے زیادہ اہل نوجوان قرض اسکیموں اور دستیاب مواقع سے فائدہ اٹھا سکیں۔
نوجوانوں کو کاروباری مواقع فراہم کرنے کا عزم
وزیراعظم شہباز شریف نے اجلاس میں کہا کہ نوجوان ملک کا قیمتی اثاثہ ہیں اور حکومت ان کی صلاحیتوں سے فائدہ اٹھانے، انہیں باعزت روزگار کے مواقع فراہم کرنے اور معاشی سرگرمیوں میں ان کی شمولیت بڑھانے کے لیے پرعزم ہے۔
اجلاس میں وزیر خزانہ محمد اورنگزیب، وزیراعظم کے معاونین خصوصی برائے امور نوجوانان رانا مشہود احمد خان اور سیاسی امور طلحہ برکی سمیت دیگر متعلقہ حکام نے شرکت کی۔
مزید پڑھیں
راولپنڈی ٹیسٹ: سری لنکا نے ٹاس جیت کر پاکستان کے خلاف فیلڈنگ کا فیصلہ کرلیا
