مغربی ہوائیں ملک میں داخل
محکمہ موسمیات کے مطابق مغربی ہواؤں کا سلسلہ آج سے ملک میں داخل ہونے جا رہا ہے جس کے باعث آئندہ دنوں کے دوران ملک کے مختلف حصوں میں وقفے وقفے سے بارش اور شمالی علاقوں میں برفباری کا امکان ہے۔ اس سسٹم کے تحت شہریوں کو بارش، یخ بستہ ہواؤں اور درجہ حرارت میں کمی کے لیے تیار رہنے کی ہدایت کی جا رہی ہے۔
بلوچستان کے 23 اضلاع میں بارش کا امکان
بلوچستان کے متعدد اضلاع میں بارش کی پیشگوئی کی گئی ہے جن میں کوئٹہ، زیارت، قلات، چمن، پشین اور قلعہ عبداللہ شامل ہیں۔ اسی طرح قلعہ سیف اللہ، نوشکی، ہرنائی، ژوب، بارکھان، سبی، لورالائی اور موسیٰ خیل میں بھی بارش متوقع ہے۔ کیچ، گوادر، لسبیلہ، آواران، چاغی، پنجگور، خضدار، واشک اور خاران میں بھی بارش کے امکانات ظاہر کیے گئے ہیں۔
شمالی علاقوں میں برفباری کی پیشگوئی
مغربی سسٹم کے باعث شمالی پہاڑی علاقوں میں برفباری کی توقع ہے جس سے سردی کی شدت میں مزید اضافہ ہوگا۔ سیاحتی مقامات پر سیاحوں کو احتیاطی تدابیر اختیار کرنے کی ہدایت کی گئی ہے۔
خیبرپختونخوا کے مختلف علاقوں میں بارش اور تیز ہوائیں
تیس دسمبر سے یکم جنوری کے دوران چترال، دیر، سوات، شانگلہ، کوہستان، بٹگرام، مانسہرہ، ایبٹ آباد، ہری پور، بونیر، باجوڑ، مہمند، صوابی اور کوہاٹ میں تیز ہواؤں کے ساتھ وقفے وقفے سے بارش کا امکان ہے جبکہ بالائی علاقوں میں درمیانے سے شدید درجے کی برفباری بھی متوقع ہے۔
گلگت بلتستان اور کشمیر میں بارش و برفباری
30 دسمبر سے 2 جنوری کے دوران گلگت بلتستان کے علاقوں دیامیر، استور، غذر، اسکردو، ہنزہ، گلگت اور شگر میں بارش اور برفباری کی پیشگوئی کی گئی ہے۔ اسی طرح آزاد کشمیر میں بھی وقفے وقفے سے بارش اور درمیانے درجے کی برفباری متوقع ہے۔
مزید پڑھیں
وزیراعظم نے مظفرآباد میں جدید کینسر اسپتال اور میڈیکل کالج افتتاح کر دیا
