گلگت بلتستان میں نظامِ زندگی مفلوج
ملک کے بالائی علاقوں میں شدید بارش اور برفباری کے بعد معمولاتِ زندگی بری طرح متاثر ہو گئے ہیں۔ گلگت بلتستان کے ضلع استور میں برفباری کے باعث رابطہ سڑکیں تاحال بحال نہیں ہو سکیں، جس کے نتیجے میں ایک بیمار شخص اسپتال پہنچنے سے پہلے ہی دم توڑ گیا۔
بلوچستان کے بالائی اضلاع میں لوگ محصور
بلوچستان کے علاقوں چمن، قلعہ عبداللہ، زیارت اور پاک افغان سرحدی پٹی میں شدید برفباری سے زمینی رابطے منقطع ہو چکے ہیں۔ توبہ اچکزئی اور توبہ کاکڑی سمیت درجنوں دیہاتوں کے مکین گھروں میں محصور ہیں جبکہ خوراک اور ایندھن کی شدید قلت پیدا ہو گئی ہے۔
ہیلی کاپٹر واحد سہارا
کنٹرول روم حکام کے مطابق بعض دور دراز علاقوں میں امدادی سرگرمیوں کے لیے ہیلی کاپٹر ہی واحد ذریعہ رہ گیا ہے، جبکہ زمینی راستوں کی بحالی میں مزید وقت لگ سکتا ہے۔
آزاد کشمیر اور سوات میں صورتحال
آزاد کشمیر کی وادی نیلم میں برفباری رک چکی ہے، تاہم مرکزی شاہراہ تاوبٹ تک برفانی تودے گرنے کے باعث بند ہے۔ نکیال کے تیرہ دیہاتوں میں بجلی کی فراہمی معطل ہے۔ ادھر سوات کے بالائی علاقوں میں بند سڑکوں کی بحالی کا کام جاری ہے۔
مزید برفباری کی پیشگوئی
محکمہ موسمیات کے مطابق ہزارہ اور مالاکنڈ ڈویژن میں ایک بار پھر برفباری کا سلسلہ شروع ہو چکا ہے، جس کے باعث کمراٹ اور گلیات کی تمام شاہراہیں مکمل طور پر بند ہو گئی ہیں اور ریسکیو آپریشن جاری ہے۔
مزید پڑھیں
درآمدی گندم رعایتی نرخوں پر فروخت، 22 ارب روپے نقصان کا خدشہ
