بالائی علاقوں میں شدید برفباری
ملک کے بالائی علاقوں میں شدید برفباری کے باعث نظامِ زندگی مفلوج ہو گیا ہے۔ مختلف علاقوں میں رابطہ سڑکیں بند ہونے سے سیاح اور مقامی افراد مشکلات کا شکار ہیں، جبکہ حادثات میں 2 افراد جان کی بازی ہار گئے۔
بلوچستان میں برفانی طوفان
بلوچستان کے شمالی بالائی علاقوں میں برفانی طوفان جاری ہے۔ زیارت جانے والی درجنوں گاڑیاں کوئٹہ–زیارت شاہراہ پر پھنس گئیں جبکہ چمن کے گردونواح میں 100 سے زائد سیاح گاڑیوں میں محصور ہیں۔
این 50 شاہراہ پر ٹریفک متاثر
این 50 شاہراہ کان مہترزئی، خانوزئی اور مسلم باغ سمیت مختلف مقامات پر شدید برف اور پھسلن کے باعث ٹریفک معطل رہی۔ بین الصوبائی شاہراہ پر 9 مختلف حادثات میں 27 افراد زخمی ہوئے۔
کوژک ٹاپ پر شدید سردی
کوژک ٹاپ کے مقام پر سائبیرین ہواؤں کے باعث درجہ حرارت منفی 12 ڈگری تک گر گیا۔ شیلاباغ کے قریب پھسلن کے باعث گاڑیاں ٹکرا گئیں، جس کے نتیجے میں 2 افراد جاں بحق اور 7 زخمی ہو گئے۔
خیبر پختونخوا کے بالائی علاقے متاثر
مانسہرہ، گلیات، شانگلہ، لوئر دیر، مہمند، کالام، اورکزئی، چترال اور خیبر کے بالائی علاقوں میں شدید برفباری ہوئی۔ وادی تیراہ میں 100 کے قریب گاڑیاں پھنس گئیں جبکہ 35 افراد کو محفوظ مقامات پر منتقل کیا گیا۔
بجلی اور رابطہ سڑکوں کی بندش
شانگلہ میں برفباری کے بعد بجلی کا نظام درہم برہم ہو گیا، جبکہ چترال میں متعدد رابطہ سڑکیں بند ہو گئیں جس سے معمولاتِ زندگی شدید متاثر ہوئے۔
گلگت بلتستان میں زمینی رابطہ منقطع
گلگت بلتستان کے ضلع استور کے بالائی علاقوں میں دو سے تین فٹ تک برفباری ہو چکی ہے، جس کے باعث تمام زمینی راستے بند اور لوگ گھروں میں محصور ہو گئے ہیں۔ ہنزہ اور نگر میں بھی برفباری ہوئی۔
سیاحتی مقامات پر برف کا حسن
ناران میں 6 انچ اور شوگران میں ڈیڑھ انچ برف پڑ چکی ہے۔ سیاح بڑی تعداد میں شوگران پہنچ گئے ہیں، جبکہ بابوسر ٹاپ، نانگا پربت اور ملحقہ علاقوں میں سردی کی شدت بڑھ گئی ہے۔
مری اور آزاد کشمیر کا حال
مری میں مسلسل برفباری کے باعث مری ایکسپریس وے کو جزوی طور پر بند کر دیا گیا ہے۔ آزاد کشمیر کے مختلف علاقوں میں بارش اور بالائی علاقوں میں وقفے وقفے سے برفباری کا سلسلہ جاری ہے۔
مزید پڑھیں
اگر استعفے سے کراچی بچتا ہے تو ابھی چھوڑنے کو تیار ہوں، مصطفیٰ کمال
