خودکشی کا ڈراما رچا کر غائب ہونے والا ملزم 42 دن بعد پکڑا گیا اپاکستان کے غیر ملکی قرضوں اور گرانٹس میں نمایاں اضافہ، 4 ماہ میں شرح 157 فیصد رہی آصف مرچنٹ کو امریکی عہدیدار کے قتل کی سازش کے کیس میں 330 ماہ قید خلیجی ممالک کے ہنگامی طبی منصوبے کو سعودی کابینہ نے منظور کر لیا
A bold graphic with the words "BREAKING NEWS" in red and black, conveying urgency and importance in news reporting.

وزیراعلیٰ پنجاب نے صوبے میں پنچائیت نظام نافذ کرنے کی اصولی اجازت دے دی

Punjab Panchayat System

وزیراعلیٰ پنجاب مریم نواز شریف نے صوبے بھر میں پنچائیت نظام کے قیام کی اصولی منظوری دے دی ہے۔ مجوزہ نظام کے تحت مقامی سطح پر چھوٹے موٹے تنازعات کو باہمی رضامندی، ثالثی اور افہام و تفہیم کے ذریعے حل کیا جائے گا، تاکہ شہریوں کو کم خرچ اور فوری انصاف کی سہولت فراہم کی جاسکے۔
یہ فیصلہ وزیراعلیٰ کی زیر صدارت ہونے والے اجلاس میں کیا گیا، جہاں حکام نے پنچائیت نظام کے مجوزہ طریقہ کار اور قانونی فریم ورک کے حوالے سے تفصیلی بریفنگ دی۔ حکومت اس نظام کو باقاعدہ قانونی شکل دینے کے لیے پنجاب پنچائیت ایکٹ متعارف کرانے کی تیاری کررہی ہے۔

یونین کونسل اور گاؤں کی سطح پر پنچائیت کمیٹیاں قائم ہوں گی

مجوزہ منصوبے کے مطابق پنجاب بھر میں یونین کونسل، گاؤں، علاقے اور موضع کی سطح پر پنچائیت کمیٹیاں تشکیل دی جائیں گی۔ یہ کمیٹیاں متعلقہ فریقین کی باہمی رضامندی سے مقامی تنازعات حل کرنے میں کردار ادا کریں گی۔

حکام کی بریفنگ کے مطابق ڈپٹی کمشنرز اپنے متعلقہ علاقوں کے مستقل رہائشیوں کو پنچائیت کمیٹیوں کا رکن مقرر کریں گے۔ ارکان کا انتخاب اچھی شہرت، غیر جانبداری، دانشمندی اور عوامی اعتماد کی بنیاد پر کیا جائے گا۔

پنچائیت کے ارکان میں کون شامل ہوگا؟

مجوزہ نظام کے تحت پنچائیت کمیٹیوں میں نمبردار، اساتذہ، ریٹائرڈ ججز، سابق فوجی افسران، ریٹائرڈ سول سرونٹس اور دیگر معزز مقامی شخصیات کو شامل کیا جاسکے گا۔

حکومت کا مقصد ایسے افراد کو ذمہ داری دینا ہے جنہیں مقامی سطح پر اعتماد اور عزت کی نگاہ سے دیکھا جاتا ہو اور جو تنازعات کے حل میں غیر جانبدارانہ کردار ادا کرسکیں۔

خواتین اور کمزور طبقات کے تحفظ کے لیے خصوصی اقدامات

اجلاس کو بتایا گیا کہ پنچائیت نظام کو واضح قانونی حدود کے اندر چلایا جائے گا تاکہ اس کا غلط استعمال نہ ہوسکے۔ خواتین، اقلیتوں، غریب اور دیگر کمزور طبقات کے حقوق کے تحفظ کے لیے خصوصی اقدامات بھی مجوزہ فریم ورک کا حصہ ہوں گے۔
اس مقصد کے لیے ایسے معاملات کی ایک منفی فہرست بھی تیار کی جائے گی جو پنچائیت کے دائرہ اختیار میں شامل نہیں ہوں گے۔ اس اقدام کا مقصد خواتین اور کمزور طبقات کے خلاف پنچائیت کے ممکنہ غلط استعمال کو روکنا ہے۔

عدالتوں کا اختیار برقرار رہے گا

مجوزہ پنچائیت نظام کے تحت شہریوں کا عدالتوں سے رجوع کرنے اور قانونی تحفظ حاصل کرنے کا حق برقرار رہے گا۔ پنچائیت کمیٹیاں صرف باہمی رضامندی سے تنازعات کے غیر رسمی حل کے لیے کام کریں گی اور عدالتی نظام کے اختیارات کو متاثر نہیں کریں گی۔

وزیراعلیٰ مریم نواز نے متعلقہ حکام کو ہدایت کی کہ پنچائیت پروگرام کے لیے جامع قواعد، پالیسی گائیڈ لائنز اور ضوابط تیار کیے جائیں، جبکہ کمیٹیوں کے اختیارات اور دائرہ کار کا واضح تعین بھی کیا جائے۔

پنجاب پنچائیت ایکٹ متعارف کرانے کی تیاری

وزیراعلیٰ کے مطابق پنچائیت نظام کا مقصد پنجاب میں صدیوں پرانی مقامی ثالثی اور باہمی افہام و تفہیم کی روایت کو قانونی فریم ورک کے تحت بحال کرنا ہے۔
ان کا کہنا تھا کہ ہر اختلاف کے حل کے لیے عدالت سے رجوع کرنا ضروری نہیں، بلکہ بعض چھوٹے تنازعات مکالمے اور معزز مقامی افراد کی مدد سے بھی حل کیے جاسکتے ہیں۔ حکومت کا مؤقف ہے کہ اس نظام سے عدالتوں پر مقدمات کا بوجھ کم کرنے اور عوام کو ان کی دہلیز پر سستا اور فوری انصاف فراہم کرنے میں مدد ملے گی۔

مزید پڑھیں
فیکٹ چیک: 18 سال کی عمر کے بعد 90 روز میں شناختی کارڈ نہ بنوانے پر قید ہو سکتی ہے

:دوسروں کے ساتھ اشتراک کریں

:متعلقہ مضامین