زلزلے کا مرکز اور شدت
فلپائن کے وسطی ساحلی علاقے میں رات گئے 6.9 شدت کا زلزلہ آیا۔ جس نے پورے خطے کو ہلا کر رکھ دیا۔ امریکی جیولوجیکل سروے کے مطابق زلزلہ رات 10 بجے آیا۔ جس کی گہرائی 10 کلو میٹر اور مرکز بوگو شہر کے شمال مشرق میں 17 کلو میٹر کے فاصلے پر تھا۔
جانی نقصان اور زخمی
غیر ملکی میڈیا رپورٹس کے مطابق زلزلے کے باعث مختلف حادثات میں 31 افراد جاں بحق اور درجنوں افراد زخمی ہوگئے۔ متاثرین میں وہ لوگ بھی شامل ہیں۔ جو زلزلے کے دوران عمارتوں اور کھیل کے میدانوں میں موجود تھے۔
عمارتوں اور انفراسٹرکچر کی تباہی
زلزلے کے نتیجے میں کئی عمارتیں زمین بوس ہوگئیں۔ ایک اسپورٹس کمپلیکس باسکٹ بال میچ کے دوران گر گیا۔ جبکہ گرجا گھروں، پلوں اور سڑکوں کو بھی شدید نقصان پہنچا۔ مقامی میڈیا کے مطابق متاثرہ علاقوں میں مسلسل آفٹر شاکس محسوس کیے گئے جس سے شہری خوفزدہ ہو کر گھروں سے باہر نکل آئے۔
ریسکیو اور ایمرجنسی اقدامات
حکام نے سیبو میں ہنگامی حالت نافذ کر دی اور آج اسکولز و سرکاری دفاتر بند کرنے کا اعلان کیا۔ ریسکیو ادارے ملبے تلے دبے افراد کو نکالنے کے لیے سرگرم ہیں۔ جبکہ دیگر شہروں سے بھاری مشینری روانہ کی گئی ہے۔ ڈیزاسٹر منیجمنٹ کے مطابق کچھ علاقوں میں بجلی اور مواصلاتی نظام متاثر ہوا ہے۔ جس سے امدادی کارروائیوں میں مشکلات پیش آ رہی ہیں۔ حکومت نے متاثرہ علاقوں میں پانی، ادویات اور دیگر ضروری سامان فوری طور پر پہنچانے کی ہدایت کی ہے۔ اور ہلاکتوں میں اضافے کا خدشہ ظاہر کیا ہے۔
مزید پڑھیں
فتح کے بعد بھی شکست بھارت کا مقدر
