سرکاری محکموں کیلئے بڑا فیصلہ
پنجاب حکومت نے ماحول دوست ٹرانسپورٹ کے فروغ کے لیے پیٹرول اور ڈیزل سے چلنے والی گاڑیوں کی خریداری پر مکمل پابندی عائد کرنے کا فیصلہ کر لیا ہے۔ یہ پابندی صوبے کے تمام سرکاری محکموں پر لاگو ہوگی۔
صرف الیکٹرک اور ہائبرڈ گاڑیاں خریدی جائیں گی
حکومتی فیصلے کے تحت آئندہ سرکاری ادارے صرف الیکٹرک یا ہائبرڈ گاڑیاں ہی خرید سکیں گے، تاہم فیلڈ ڈیوٹی پر استعمال ہونے والی گاڑیوں کو اس پابندی سے مستثنیٰ قرار دیا گیا ہے۔
ماحولیاتی تحفظ حکومت کی ترجیح
چیف سیکرٹری پنجاب کے مطابق صوبے میں گرین انرجی اور ماحولیاتی تحفظ کو اولین ترجیح دی جا رہی ہے، اسی مقصد کے تحت نئی الیکٹرک وہیکل پالیسی جلد متعارف کروائی جائے گی۔
نئے پیٹرول پمپس کیلئے نئی شرط
حکومت نے نئے پیٹرول پمپس کے لیے این او سی کو الیکٹرک چارجنگ یونٹ کی تنصیب سے مشروط کر دیا ہے۔ کسی بھی نئے پیٹرول پمپ کو چارجنگ سہولت کے بغیر کام کرنے کی اجازت نہیں ہوگی۔
ایک سو ستر پیٹرول پمپس پر چارجنگ یونٹس لازمی
صوبے کے 31 شہروں میں 170 نئے پیٹرول پمپس کو این او سی جاری کی گئی ہے، جن پر الیکٹرک چارجنگ یونٹس کی تنصیب لازمی قرار دی گئی ہے۔
بڑے شہروں میں تفصیلات
فیصل آباد میں 29، لاہور میں 14، بہاولپور میں 10 جبکہ خانیوال اور بہاولنگر میں 9، 9 پیٹرول پمپس کو چارجنگ سہولت فراہم کرنے کی شرط پر منظوری دی گئی ہے۔
مزید پڑھیں
حکومت کا نئے کرنسی نوٹ متعارف کرانے کا فیصلہ، ڈیزائن کیلئے کمیٹی قائم
