میئر کراچی
میئر کراچی بیرسٹر مرتضیٰ وہاب نے کہا ہے کہ گل پلازہ کی عمارت دو تہائی کلیئر ہو چکی ہے اور ریسکیو کے دوران مزید لاشیں نہیں ملیں، تاہم لاشوں کی شناخت کا عمل جاری ہے اور حتمی تعداد بعد میں بتائی جائے گی۔
ریسکیو آپریشن کی صورتحال
میڈیا سے گفتگو کرتے ہوئے میئر کراچی نے بتایا کہ گل پلازہ میں ریسکیو آپریشن 70 فیصد مکمل ہو چکا ہے، جبکہ پہلے اور دوسرے فلور کو کلیئر کر دیا گیا ہے۔ لاپتا افراد سے متعلق 81 شکایات موصول ہوئیں، جن کی بنیاد پر تلاش کا عمل جاری رکھا گیا۔
حتمی اعداد و شمار بعد میں
مرتضیٰ وہاب کے مطابق بلڈنگ کنٹرول اتھارٹی عمارت کا تفصیلی جائزہ لے رہی ہے۔ ابھی یہ کہنا ممکن نہیں کہ کتنے افراد جاں بحق ہوئے، حتمی معلومات صبح فراہم کی جائیں گی۔
فائر سیفٹی سسٹم کی ضرورت
میئر کراچی نے زور دیا کہ شہر کی تمام عمارتوں میں فائر سیفٹی سسٹم نصب ہونا چاہیے تاکہ مستقبل میں ایسے افسوسناک حادثات سے بچا جا سکے۔ ان کا کہنا تھا کہ حفاظتی اقدامات پر سختی سے عملدرآمد ناگزیر ہے۔
رمپا پلازہ غیر محفوظ
دوسری جانب سندھ بلڈنگ کنٹرول اتھارٹی (ایس بی سی اے) نے گل پلازہ میں آگ کے بعد متصل عمارت رمپا پلازہ کو غیر محفوظ قرار دے دیا ہے۔ ایس بی سی اے کے مطابق رمپا پلازہ انتظامیہ اور دکان مالکان کو نوٹس جاری کر دیے گئے ہیں، جبکہ ملبے کے باعث متاثر ہونے والے ستونوں کے پیشِ نظر خطرناک حصے کے استعمال پر پابندی عائد کر دی گئی ہے۔
مزید پڑھیں
گل پلازہ سانحے کے بعد کارروائی، رمپا پلازہ غیر محفوظ، انتظامیہ کو نوٹس
