ماہرین کا انتباہ: AI چیٹ بوٹس پر بڑھتا انحصار
ماہرینِ نفسیات نے خبردار کیا ہے کہ اے آئی چیٹ بوٹس سے غیر ضروری بات چیت اور مشورے لینے کا رجحان تیزی سے بڑھ رہا ہے، جو انسان کو سماجی طور پر تنہا، ذہنی طور پر کمزور اور جذباتی طور پر غیر متوازن بنا رہا ہے۔
اوپن اے آئی کی رپورٹ کے مطابق ہر ہفتے ایک ملین سے زائد صارفین چیٹ جی پی ٹی کو ایسے پیغامات بھیجتے ہیں جن میں ممکنہ خودکشی کے خیالات یا ارادے شامل ہوتے ہیں۔
سماجی تنہائی اور دماغی کمزوری کے اثرات
ماہرِ نفسیات پروفیسر ڈاکٹر محمد اقبال آفریدی کے مطابق اے آئی کے غیر ضروری استعمال نے انسان کو سوشل آئسولیشن کا شکار بنا دیا ہے۔
انہوں نے کہا کہ جب دماغ کو استعمال نہیں کیا جاتا تو اس کی کارکردگی متاثر ہوتی ہے۔
اب لوگ گفتگو، جسمانی سرگرمی اور تخلیقی صلاحیتوں سے دور ہوتے جا رہے ہیں، جس سے خوشی کے احساسات پیدا کرنے والے کیمیکلز کم ہو جاتے ہیں۔
چیٹ بوٹس سے مشورے لینے کے خطرات
ڈاکٹر آفریدی کا کہنا تھا کہ چیٹ بوٹس جذبات کو نہیں سمجھتے، اسی لیے ان کے مشورے اکثر غیر حقیقی یا خطرناک ثابت ہوتے ہیں۔
انہوں نے بتایا کہ ایسے لوگ جو چیٹ بوٹس سے زیادہ گفتگو کرتے ہیں، ان میں ڈپریشن، انزائٹی اور خودکشی کے خیالات کے امکانات بڑھ جاتے ہیں۔
نوجوان نسل میں بڑھتا انحصار
کلینیکل سائیکولوجسٹ ڈاکٹر اسما احمد کے مطابق نوجوان نسل معمولی علامات پر بھی اے آئی سے رجوع کر رہی ہے، جس سے ان کی تنقیدی سوچ متاثر ہو رہی ہے۔
انہوں نے کہا کہ بچوں کو چاہیے کہ وہ اپنے والدین سے کھل کر بات کریں، تاکہ وہ جذباتی طور پر مضبوط رہیں۔
حل: ڈیجیٹل ڈیٹاکسیفکیشن کی ضرورت
ماہرین نے مشورہ دیا ہے کہ روزانہ اسکرین ٹائم دو گھنٹے سے کم رکھا جائے، غیر ضروری چیٹ بوٹس سے بات چیت ترک کی جائے، اور حقیقی زندگی میں زیادہ وقت گزارا جائے۔
ڈاکٹر آفریدی کے مطابق: انسان کا کوئی متبادل نہیں۔ جذباتی وابستگی کے لیے حقیقی انسانی تعلق ضروری ہے۔
مزید پڑھیں
رات کی زیادہ روشنی، ادھیڑ عمر افراد کے لیے خطرے کی گھنٹی
