کے پی میں منشیات فروشوں پر کریک ڈاؤن کی ہدایت
خیبر پختونخوا کے وزیراعلیٰ سہیل آفریدی نے صوبے میں منشیات بنانے، فروخت کرنے اور سپلائی کرنے والوں کے خلاف سخت کارروائی کا حکم دے دیا ہے۔ وزیراعلیٰ نے واضح کیا کہ ہیروئن اور آئس سمیت تمام خطرناک منشیات کا جڑ سے خاتمہ ناگزیر ہے، کیونکہ یہ لعنت تعلیمی اداروں اور نوجوانوں تک پہنچ چکی ہے۔
جامعات میں منشیات کے پھیلاؤ پر تشویش
اجلاس سے خطاب کرتے ہوئے وزیراعلیٰ سہیل آفریدی نے کہا کہ صوبے کی جامعات تک منشیات کا پھیلنا انتہائی خطرناک صورتِ حال ہے۔ حکومت مزید غفلت کی متحمل نہیں ہو سکتی اور نوجوان نسل کو منشیات کی تباہی سے بچانے کے لیے فوری اقدامات ضروری ہیں۔
سپلائرز اور مینوفیکچررز کے خلاف سخت ایکشن کا فیصلہ
اجلاس میں فیصلہ کیا گیا کہ منشیات تیار کرنے اور سپلائی کرنے والے بڑے گروہوں کے خلاف مربوط حکمت عملی اپنائی جائے گی۔ مختلف محکموں اور اداروں پر مشتمل مشترکہ ٹیم تشکیل دینے کی بھی ہدایت کر دی گئی ہے تاکہ بڑے سپلائرز اور ڈیلرز تک پہنچ کر مؤثر کارروائی کی جا سکے۔
زیرو ٹالرنس پالیسی اور شفاف کارروائی
سہیل آفریدی نے واضح کیا کہ منشیات کے خلاف زیرو ٹالرنس پالیسی اپنائی جائے۔ کسی بےگناہ کو تنگ نہ کیا جائے بلکہ حقیقی مجرموں کے خلاف کارروائی کی جائے۔ انہوں نے یہ بھی کہا کہ حکومت ہر ممکن تعاون فراہم کرے گی جبکہ ضبط شدہ منشیات کو تلف کرنا ناگزیر ہے تاکہ وہ دوبارہ مارکیٹ میں فروخت نہ ہوسکیں۔
مزید پڑھیں
پی ٹی آئی کا اعلان: اقتدار ملا تو دونوں ترامیم واپس لی جائیں گی، اسد قیصر
