خیبر پختونخوا حکومت نے اسلام آباد کے قریب مکھنیال، ضلع ہری پور میں نئے ’کے پی ہاؤس‘ کی تعمیر کا منصوبہ باضابطہ طور پر منظور کر لیا ہے۔ یہ نیا پختونخوا ہاؤس اسلام آباد سے صرف 20 منٹ کی مسافت پر ہوگا اور صوبائی حکومت کے مطابق اس منصوبے کا مقصد سرکاری و سرکاری سرگرمیوں کو سہولت فراہم کرنا ہے۔
منصوبے کی منظوری اور بجٹ
سرکاری ریکارڈ کے مطابق نئے کے پی ہاؤس کو سالانہ ترقیاتی پروگرام (ADP 2025-26) میں شامل کیا گیا ہے۔ منصوبے کی کل لاگت 500 ملین روپے مقرر کی گئی ہے، جن میں سے 250 ملین روپے ابتدائی طور پر رواں مالی سال کے لیے مختص کیے جا چکے ہیں۔ یہ بجٹ تعمیراتی مراحل اور بنیادی انفراسٹرکچر کی تیاری پر خرچ ہوگا۔
زمین کی نشاندہی اور انتظامی اقدامات
خیبر پختونخوا حکومت کی دستاویزات کے مطابق منصوبے کے لیے ڈپٹی کمشنر ہری پور کو زمین کی نشاندہی کی ذمہ داری سونپی گئی ہے۔ اس کے ساتھ ساتھ چیف انجینئر، سیکرٹری کمشنر ہزارہ ڈویژن اور دیگر محکموں کو بھی احکامات جاری کیے گئے ہیں تاکہ منصوبہ بروقت آگے بڑھ سکے۔
ابتدائی نوٹیفکیشن اور کاغذی کارروائی
دستاویزات کے مطابق منصوبے سے متعلق ابتدائی نوٹیفکیشن 3 ستمبر 2025 کو جاری کیا گیا۔ اس کی کاپی چیف انجینئر ایسٹ، سیکرٹری کمشنر ہزارہ ڈویژن اور دیگر متعلقہ افسران کو بھی بھیجی گئی۔ فی الحال منصوبہ زمین کی نشاندہی اور کاغذی کارروائی کے مرحلے میں ہے۔
آئندہ کے مراحل
ذرائع کا کہنا ہے کہ منصوبے کی عملی تکمیل کے لیے حتمی ڈیزائن اور ٹھیکہ کمپنی کے تعین کے بعد کام کا آغاز کیا جائے گا۔ حکومت کا مؤقف ہے کہ اس منصوبے سے خیبر پختونخوا حکومت کو اسلام آباد کے قریب ایک بہتر اور جدید سہولت میسر آئے گی، جو صوبائی اور وفاقی سطح کے اجلاسوں کے لیے معاون ثابت ہوگی۔
مزید پڑھیں
نیتن یاہو کا اعتراف: قطر سمیت کئی ممالک نے اسرائیل کو تنہا کر دیا
