وفاقی وزیر برائے پارلیمانی امور ڈاکٹر طارق فضل چوہدری نے صدر مملکت آصف علی زرداری اور وزیراعظم شہباز شریف کی ملاقات کے بعد مثبت پیش رفت کی امید ظاہر کرتے ہوئے کہا ہے کہ ملک کے مفاد میں بہتر فیصلہ سامنے آئے گا۔
ایک بیان میں طارق فضل چوہدری کا کہنا تھا کہ دونوں رہنماؤں کی ملاقات اور باہمی مشاورت سے اہم معاملات پر پیش رفت متوقع ہے۔ ان کے مطابق قومی معاملات کو افہام و تفہیم اور مشاورت کے ذریعے حل کرنا ضروری ہے۔
صدر اور وزیراعظم کی ملاقات میں کیا طے پایا؟
صدر آصف علی زرداری اور وزیراعظم شہباز شریف نے 19 نومبر کو ایوانِ صدر اسلام آباد میں ملاقات کی، جس میں وزیر داخلہ محسن نقوی بھی شریک تھے۔
ایوانِ صدر کے مطابق ملاقات میں ملک کی موجودہ سیاسی صورتحال اور مشرقِ وسطیٰ کے حالات کا جائزہ لیا گیا۔ دونوں رہنماؤں نے اتفاق کیا کہ تمام معاملات پر مل بیٹھ کر بات چیت اور باہمی مشاورت کے ذریعے حل نکالا جائے گا۔
ریفرنڈم عوامی رائے جاننے کا آئینی طریقہ ہے، طارق فضل
طارق فضل چوہدری نے ریفرنڈم کے معاملے پر گفتگو کرتے ہوئے کہا کہ اس کا بنیادی مقصد کسی اہم یا متنازع معاملے پر براہِ راست عوام کی رائے حاصل کرنا ہے۔
ان کا کہنا تھا کہ ریفرنڈم آئین میں موجود ایک آئینی اور سیاسی آپشن ہے، جس کے ذریعے عوام سے کسی معاملے پر ان کی رائے پوچھی جاسکتی ہے۔ انہوں نے کہا کہ کسی سیاسی رہنما کے بیان سے آئین میں موجود ریفرنڈم کا طریقہ غیر آئینی نہیں ہوجاتا۔
وفاقی وزیر کے مطابق عوامی رائے سامنے آنے کے بعد اس پر عمل درآمد کے طریقہ کار کا تعین کیا جاسکتا ہے۔
قبل از وقت انتخابات کا کوئی جواز نہیں، وفاقی وزیر
طارق فضل چوہدری نے قبل از وقت عام انتخابات کے امکان کو مسترد کرتے ہوئے کہا کہ موجودہ حکومت اپنی آئینی مدت مکمل کرے گی اور انتخابات مقررہ وقت پر ہوں گے۔
انہوں نے واضح کیا کہ عام انتخابات اور ریفرنڈم دو الگ آئینی و سیاسی عمل ہیں، جن کے مقاصد بھی مختلف ہیں۔ ان دونوں کو ایک دوسرے کا متبادل قرار نہیں دیا جاسکتا۔
انتخابی اصلاحات کمیٹی بھی قائم کردی گئی
وفاقی وزیر نے بتایا کہ انتخابی عمل کو مزید شفاف بنانے کے لیے انتخابی اصلاحات کمیٹی تشکیل دی گئی ہے، جو انتخابات کے نظام میں بہتری کے لیے اقدامات پر کام کرے گی۔
ان کے مطابق انتخابی شفافیت اور عوامی اعتماد کو مضبوط بنانے کے لیے اصلاحات ضروری ہیں، جبکہ قومی معاملات پر سیاسی جماعتوں کے درمیان مشاورت کا عمل بھی جاری رہنا چاہیے۔
سیاسی اختلافات مذاکرات سے حل کرنے پر اتفاق
صدر اور وزیراعظم کی ملاقات ایسے وقت میں ہوئی ہے جب حکمران اتحاد میں شامل مسلم لیگ (ن) اور پیپلز پارٹی کے درمیان بعض سیاسی معاملات پر اختلافات سامنے آئے ہیں۔
ایوانِ صدر کے اعلامیے کے مطابق دونوں رہنماؤں نے اس بات پر اتفاق کیا کہ تمام زیرِ التوا معاملات بات چیت اور مشاورت کے ذریعے حل کیے جائیں گے۔ طارق فضل چوہدری نے بھی اس ملاقات کے نتیجے میں ملک کے مفاد میں مثبت پیش رفت کی امید ظاہر کی ہے۔
مزید پڑھیں
ایران پر نئے حملوں کا معاملہ ملتوی، امریکی صدر نے فیصلہ اگلے سال تک ٹال دیا









