سلمان آغا کا جیت سے متعلق بیان
پاکستان کرکٹ ٹیم کے مڈل آرڈر بیٹر سلمان آغا نے بنگلادیش کے خلاف جاری پہلے ٹیسٹ میچ کے آخری روز سے قبل کہا ہے کہ اگر پاکستان کو 70 اوورز میں 260 رنز کا ہدف ملا تو ٹیم یقینی طور پر جیت کیلئے میدان میں اترے گی۔
ڈھاکا ٹیسٹ دلچسپ مرحلے میں داخل
پاکستان بمقابلہ بنگلادیش پہلے ٹیسٹ کے چوتھے روز کے اختتام پر بنگلادیش نے دوسری اننگز میں 3 وکٹوں کے نقصان پر 152 رنز بنائے جبکہ اسے پاکستان پر 179 رنز کی مجموعی برتری حاصل ہوگئی۔ سلمان علی آغا نے پریس کانفرنس میں کہا کہ اس وقت یہ کہنا مشکل ہے کہ میچ میں کس ٹیم کو برتری حاصل ہے کیونکہ آخری روز کا کھیل انتہائی اہم اور دلچسپ ہوگا۔
پاکستان کی حکمت عملی کیا ہوگی؟
انہوں نے کہا کہ پاکستان کی اولین کوشش یہی ہوگی کہ بنگلادیشی ٹیم کو جلد از جلد آؤٹ کیا جائے تاکہ ہدف کا تعاقب کرنے کیلئے مناسب وقت مل سکے۔سلمان آغا کے مطابق اگر بنگلادیش 60 سے 70 اوورز میں تقریباً 260 رنز کا ہدف دیتا ہے تو پاکستان جیت کیلئے ضرور کوشش کرے گا، تاہم انہیں نہیں لگتا کہ میزبان ٹیم اتنا خطرہ مول لے گی۔
مشکل ہدف پر بھی اظہار خیال
پاکستانی بیٹر نے کہا کہ اگر آخری روز 30 یا 40 اوورز میں 300 رنز کا ہدف ملا تو اسے حاصل کرنا کافی مشکل ہوگا۔ ان کے مطابق ٹیسٹ کرکٹ میں وقت اور اوورز دونوں بہت اہم کردار ادا کرتے ہیں۔
ورلڈ ٹیسٹ چیمپئن شپ کا اثر
سلمان علی آغا نے کہا کہ آئی سی سی ورلڈ ٹیسٹ چیمپئن شپ کے آغاز کے بعد اب ٹیمیں ڈرا کھیلنے کے بجائے میچ جیتنے کی کوشش کرتی ہیں۔ اسی وجہ سے اب ایسی پچز تیار کی جاتی ہیں جہاں نتیجہ نکلنے کے امکانات زیادہ ہوں۔ انہوں نے مزید کہا کہ ماضی میں ٹیسٹ میچز زیادہ تر ڈرا ہوجاتے تھے لیکن اب کرکٹ کا انداز بدل چکا ہے اور ٹیمیں جارحانہ حکمت عملی اپناتی ہیں۔
مزید پڑھیں
ایران سے پیٹرول درآمد کر کے ملک میں سستا فروخت کرنے کی تجویز سینیٹ میں پیش
