امریکی بحری بیڑے کی تعیناتی
امریکی صدر ڈونلڈ ٹرمپ نے ایران، معیشت، سرحدی سیکیورٹی اور آئندہ انتخابات سے متعلق اہم بیانات دیتے ہوئے کہا ہے کہ امریکا ایران کے ساتھ کسی ممکنہ معاہدے کی امید رکھتا ہے۔
ایران کی جانب بحری بیڑے کی پیش قدمی
آئیووا میں میڈیا سے گفتگو اور ایک تقریب سے خطاب کرتے ہوئے صدر ٹرمپ کا کہنا تھا کہ امریکی بحری بیڑہ ایران کی جانب گامزن ہے اور جون میں ایران کی جوہری صلاحیت کو ختم کر دیا گیا تھا۔
فوجی کارروائی پر دعوے
صدر ٹرمپ نے دعویٰ کیا کہ ایران میں کی گئی فوجی کارروائی کے دوران کوئی شہری ہلاک نہیں ہوا۔ ان کے مطابق امریکا کی کوشش ہے کہ ایران سے معاملات سفارتی انداز میں حل کیے جائیں اور ڈیل ممکن بنائی جائے۔
معیشت اور تیل کی قیمتوں پر بیان
صدر ٹرمپ نے کہا کہ امریکا میں تیل کی قیمتیں کم کر دی گئی ہیں اور ملکی معیشت کو مستحکم کیا گیا ہے۔ ان کے مطابق موجودہ حکومت کو مہنگائی کا بحران ورثے میں ملا تھا، تاہم ایک سال میں مہنگائی کی شرح میں نمایاں کمی لائی گئی۔
سرحدی سیکیورٹی اور غیرقانونی افراد
صدر ٹرمپ کا کہنا تھا کہ امریکا کی سرحدوں کو محفوظ بنا دیا گیا ہے اور ہزاروں جرائم پیشہ اور غیرقانونی افراد کو ملک سے واپس بھیجا جا چکا ہے۔ انہوں نے دعویٰ کیا کہ امریکی فوج کو پہلے سے زیادہ مضبوط کیا گیا ہے۔
آئندہ انتخابات پر اعتماد
صدر ٹرمپ نے اعتماد کا اظہار کرتے ہوئے کہا کہ وہ مڈٹرم الیکشن باآسانی جیت جائیں گے۔ ان کے مطابق عوام موجودہ پالیسیوں سے مطمئن ہیں۔
منی سوٹا واقعے کی تحقیقات
صدر ٹرمپ نے منی سوٹا میں پیش آنے والے واقعے کی منصفانہ تحقیقات کی یقین دہانی کراتے ہوئے کہا کہ وہ خود اس عمل کی نگرانی کریں گے۔
سابق حکومت پر تنقید
انہوں نے سابق حکومت کی پالیسیوں کو تنقید کا نشانہ بناتے ہوئے کہا کہ انہی فیصلوں کے باعث لاکھوں غیرقانونی افراد امریکا میں داخل ہوئے اور امریکی سرحد تاریخ کی بدترین صورتحال سے دوچار رہی۔
مزید پڑھیں
امریکا میں ہنگامہ،الہان عمر پر بدبودار مائع پھینکنے والا گرفتار؟
