قرض کی نوعیت اور شرائط
اسلام آباد: پاکستان اور ایشیائی ترقیاتی بینک (ADB) کے درمیان 1 ارب ڈالر کے قرض کے معاہدے پر اتفاق ہو گیا ہے، جو 7.6 فیصد کی شرح سود پر فراہم کیا جائے گا۔ ذرائع کے مطابق پاکستان کو یہ قرض ADB کی گارنٹی پر ملے گا، کیونکہ پاکستان کی کریڈٹ ریٹنگ کمزور ہے۔ اس گارنٹی کے بدلے ADB معمولی فیس بھی وصول کرے گا۔
معاہدے کی ٹرم شیٹ اور بورڈ کی منظوری
قرض کی فائنل ٹرم شیٹ اور قرض کی منظوری ADB کے 500 ملین ڈالر کی گارنٹی کی منظوری سے مشروط ہے۔ یہ منظوری ADB کے بورڈ اجلاس میں 28 مئی کو دی جائے گی۔ گارنٹی کی منظوری کے بعد پاکستان مجموعی طور پر 1.5 ارب ڈالر تک قرض حاصل کر سکے گا، جو پانچ سالہ مدت پر مشتمل ہوگا تاکہ ری فنانسنگ کے خطرات کم ہوں۔
بینک اور سود کی تفصیلات
وزارت خزانہ کے حکام کے مطابق یہ قرض اسٹینڈرڈ چارٹرڈ بینک اور دبئی اسلامک بینک سے لیا جائے گا۔ اس میں اوور نائٹ فنانسنگ ریٹ (SOFR) کے ساتھ 3.25 فیصد اضافی شرح سود لی جائے گی، جو ملا کر 7.6 فیصد بنے گا۔ تاہم SOFR میں تبدیلی کے ساتھ سود کی شرح بھی تبدیل ہو سکتی ہے۔
زرمبادلہ ذخائر پر ممکنہ اثرات
یہ قرض حکومت کو جون میں حاصل ہونے کی امید ہے، جس سے مالی سال کے اختتام پر پاکستان کے فارن ایکسچینج ذخائر میں اضافہ ہوگا۔ اس وقت ذخائر 10.6 ارب ڈالر کی سطح پر ہیں، اور حکومت کا ہدف ہے کہ ان کو جون کے اختتام تک 14 ارب ڈالر تک پہنچایا جائے۔
دیگر ذرائع سے زرمبادلہ میں اضافے کی کوششیں
ذرائع کے مطابق حکومت زرمبادلہ کے ذخائر میں اضافے کے لیے تین اقدامات کر رہی ہے
• بہتر ہوتی ترسیلات زر
• 1 ارب ڈالر کا نیا قرض
• 1.3 ارب ڈالر کے چینی قرضوں کی ری فنانسنگ
حال ہی میں فچ ریٹنگ ایجنسی کی جانب سے ریٹنگ میں بہتری آئی ہے، تاہم پاکستان کی کریڈٹ ریٹنگ ابھی بھی سرمایہ کاری گریڈ سے دو درجے نیچے ہے۔
مذید پڑھیں
دس سال میں 23 سرکاری اداروں سے قومی خزانے کو 55 کھرب روپے کا نقصان، انکشاف سامنے آ گیا
