اسلام آباد اور وانا واقعات کی تحقیقات کا اعلان
وفاقی وزیر اطلاعات عطا تارڑ نے کہا ہے کہ اسلام آباد اور وانا میں پیش آنے والے دہشت گردی کے واقعات کی مکمل تحقیقات کی جائیں گی۔ انہوں نے واضح کیا کہ جو بھی افراد یا گروہ ان واقعات میں ملوث پائے گئے، انہیں دنیا کے سامنے بے نقاب کیا جائے گا۔
دہشت گردوں کے خلاف کامیاب آپریشن پر افواج پاکستان کو خراجِ تحسین
عطا تارڑ نے وانا کیڈٹ کالج پر حملے کے دوران دہشت گردوں کے خلاف کامیاب آپریشن پر افواجِ پاکستان کو خراجِ تحسین پیش کیا۔ ان کا کہنا تھا کہ یہ ایک نہایت حساس اور مشکل آپریشن تھا، جس میں 550 طلبا کو بحفاظت ریسکیو کیا گیا۔ انہوں نے کہا کہ یہ آپریشن اے پی ایس سانحے سے بھی بڑا واقعہ ہوسکتا تھا، مگر سکیورٹی فورسز نے بہادری سے کارروائی کر کے طلبا کی جانیں بچائیں۔
افغانستان سے دہشت گردوں کی سہولت کاری بند ہونی چاہیے
وفاقی وزیر اطلاعات نے کہا کہ پاکستان نے ہمیشہ یہ مطالبہ کیا ہے کہ افغانستان کی سرزمین پاکستان کے خلاف استعمال نہ ہو۔ انہوں نے کہا کہ دہشت گردوں کی سہولت کاری کے خاتمے کے بغیر خطے میں پائیدار امن ممکن نہیں۔
بین الاقوامی برادری سے شواہد شیئر کرنے کا فیصلہ
عطا تارڑ کا کہنا تھا کہ اسلام آباد اور وانا واقعات کے ٹھوس شواہد دوست ممالک اور بین الاقوامی فورمز کے ساتھ شیئر کیے جائیں گے تاکہ دہشت گردی کے خلاف عالمی تعاون کو فروغ دیا جا سکے۔
مزید شواہد کی روشنی میں لائحہ عمل طے ہوگا
وفاقی وزیر نے کہا کہ تحقیقات کے مکمل ہونے اور مزید شواہد سامنے آنے کے بعد حکومت مستقبل کے لائحہ عمل کا اعلان کرے گی۔ انہوں نے زور دیا کہ پاکستان دہشت گردی کے خاتمے کے لیے ہر ممکن اقدام اٹھائے گا۔
مزید پڑھیں
محمود عباس اور میکرون کا اتفاق، فلسطینی آئین کی تیاری کیلئے مشترکہ کمیٹی قائم
