وزیراعظم شہباز شریف کی خصوصی ریلیف اسکیم کے تحت سستے پیٹرول کی فراہمی کے لیے جدید ڈیجیٹل نظام فعال کردیا گیا ہے۔ حکومت کے مطابق اس نظام کا مقصد مستحق شہریوں کو شفاف اور خودکار طریقے سے فی لیٹر 100 روپے کا ریلیف فراہم کرنا ہے۔
کن افراد کو ریلیف ملے گا؟
خصوصی اسکیم کے تحت موٹر سائیکل، رکشہ، چنگچی اور 800 سی سی تک کی گاڑیوں کے مالکان کو رعایتی پیٹرول فراہم کیا جائے گا۔ موٹر سائیکل اور چنگچی رکشہ مالکان کے لیے ماہانہ 20 لیٹر جبکہ 800 سی سی تک گاڑیوں کے لیے ماہانہ 30 لیٹر تک ریلیف مقرر کیا گیا ہے۔
ڈیجیٹل نظام کیسے کام کرے گا؟
حکومت نے سبسڈی کی فراہمی کے عمل کو خودکار بنانے کے لیے وزارت آئی ٹی و ٹیلی کمیونیکیشن، نادرا، صوبائی محکموں اور ٹیلی کام آپریٹرز کے تعاون سے ڈیجیٹل نظام تیار کیا ہے۔ گاڑیوں کی ملکیت اور دیگر ضروری معلومات متعلقہ سرکاری ریکارڈ سے تصدیق کی جائیں گی۔
موبائل سے رجسٹریشن کی سہولت
رعایتی پیٹرول حاصل کرنے کے لیے شہری اپنے نام پر رجسٹرڈ موبائل سم سے 9771 پر ایس ایم ایس کے ذریعے رجسٹریشن کراسکتے ہیں۔ تصدیق مکمل ہونے کے بعد اہل افراد مقررہ کوٹے کے مطابق رعایتی پیٹرول حاصل کرسکیں گے۔
شفاف طریقے سے ریلیف کی فراہمی
حکومت کا کہنا ہے کہ ڈیجیٹل نظام کے ذریعے سبسڈی صرف اہل افراد تک پہنچانے کی کوشش کی گئی ہے، تاکہ غلط استعمال اور ریکارڈ میں بے ضابطگیوں کے امکانات کم کیے جاسکیں۔
عام شہریوں کیلئے بڑا ریلیف
پیٹرول کی قیمتوں میں اضافے کے باعث موٹر سائیکل اور چھوٹی گاڑی استعمال کرنے والے شہریوں کے اخراجات میں نمایاں اضافہ ہوا ہے۔ حکومت کے مطابق اس اسکیم کا مقصد خاص طور پر محنت کش اور کم آمدنی والے طبقے کو بڑھتی ہوئی ایندھن کی قیمتوں سے کچھ ریلیف فراہم کرنا ہے۔
مزید پڑھیں
ملائیشین فٹبال لیجنڈ کی عمر سے 50 سال چھوٹی لڑکی سے شادی
