واضح مشن کا اعلان
واشنگٹن میں امریکی وزیر خارجہ مارکو روبیو نے ایران کے خلاف جاری فوجی کارروائیوں سے متعلق سخت مؤقف اختیار کرتے ہوئے کہا ہے کہ امریکا کا واضح مشن ایران کی بیلسٹک میزائل صلاحیت کو تباہ کرنا ہے تاکہ وہ خطے اور دنیا کے لیے خطرہ نہ بن سکے۔ میڈیا سے گفتگو میں انہوں نے دعویٰ کیا کہ ایران نے خلیجی ممالک میں فوجی اور غیر فوجی اہداف کو نشانہ بنایا، رہائشی عمارتوں اور ہوٹلوں پر حملے کیے اور 100 سے زائد میزائل فائر کیے۔
پیشگی حملے کا دفاع
مارکو روبیو کا کہنا تھا کہ اگر امریکا پیشگی کارروائی نہ کرتا تو جانی نقصان کہیں زیادہ ہو سکتا تھا۔ ان کے مطابق ایرانی حملوں کے ابتدائی مرحلے میں بڑے پیمانے پر نقصان ہوا۔ انہوں نے واضح کیا کہ ایران کو کسی صورت جوہری ہتھیار حاصل نہیں کرنے دیے جائیں گے، کیونکہ میزائل صلاحیت کے ساتھ ایٹمی طاقت عالمی سلامتی کے لیے بڑا خطرہ بن سکتی ہے۔
کانگریس کو بریفنگ
امریکی وزیر خارجہ نے کہا کہ ایران کے خلاف فوجی آپریشن تیزی سے جاری ہے اور تمام اقدامات بین الاقوامی قوانین کے مطابق کیے جا رہے ہیں۔ انہوں نے بتایا کہ کانگریس کو مکمل اعتماد میں لیا جا رہا ہے اور متعلقہ گروپ کو مسلسل بریفنگ دی جا رہی ہے۔
ایرانی حکومت پر تنقید
مارکو روبیو نے موجودہ ایرانی حکومت کو عوام کی نمائندہ حکومت تسلیم کرنے سے انکار کرتے ہوئے کہا کہ امریکا ایک ایسے ایران کا خواہاں ہے جو موجودہ نظام سے مختلف ہو۔ انہوں نے امید ظاہر کی کہ ایرانی عوام خود اپنی حکومت میں تبدیلی لائیں گے۔ انہوں نے یہ بھی کہا کہ اگر ایرانی عوام کو مدد درکار ہو تو امریکا بات چیت کے لیے تیار ہے۔
مزید پڑھیں
عالم اسلام کی تباہیوں کے پیچھے صہیونی ریاستی نظریہ کارفرما ہے: وزیر دفاع
