رمضان میں جعلی دودھ مافیا بے نقاب
رمضان المبارک کے دوران اسلام آباد میں ملاوٹ مافیا کے خلاف بڑی کارروائی کرتے ہوئے جعلی دودھ تیار کرنے والے گروہ کو بے نقاب کر دیا گیا۔ حکام نے بروقت کارروائی کرتے ہوئے ہزاروں لیٹر ملاوٹی دودھ تلف کر دیا۔
خفیہ اطلاع پر چھاپہ، بھاری مقدار میں جعلی دودھ برآمد
ترجمان کے مطابق خفیہ اطلاع ملنے پر لہتراڑ روڈ کے قریب ایک گھر پر چھاپہ مارا گیا جہاں مصنوعی دودھ تیار کیا جا رہا تھا۔ کارروائی کے دوران 13 ہزار لیٹر جعلی دودھ کا محلول برآمد کر کے موقع پر ہی ضائع کر دیا گیا تاکہ شہریوں کی صحت کو ممکنہ نقصان سے بچایا جا سکے۔
بناسپتی گھی اور خشک پاؤڈر سے دودھ کی تیاری
چھاپے کے دوران 480 کلو بناسپتی گھی، 50 کلو خشک پاؤڈر اور جعلی دودھ بنانے والی مشینری بھی قبضے میں لے لی گئی۔ حکام کا کہنا ہے کہ یہ ملاوٹی دودھ رمضان میں اسلام آباد اور دیگر علاقوں میں سپلائی کیا جانا تھا، جہاں دودھ اور دہی کی طلب میں نمایاں اضافہ ہو جاتا ہے۔
مزید کارروائیاں اور مقدمہ درج
حکام کے مطابق پنجاب فوڈ اتھارٹی کی معاونت سے اسلام آباد اور خیبر پختونخوا کے مختلف علاقوں میں بھی کارروائیاں جاری ہیں۔ اسلام آباد فوڈ اتھارٹی کی مدعیت میں مقدمہ درج کر کے تحقیقات کا آغاز کر دیا گیا ہے۔ فوڈ حکام نے واضح کیا ہے کہ رمضان المبارک میں ملاوٹ مافیا زیادہ متحرک ہو جاتا ہے، تاہم شہریوں کی صحت سے کھیلنے والوں کے خلاف سخت اقدامات جاری رہیں گے۔ شہری کسی بھی شکایت کی صورت میں ہیلپ لائن 1223 پر رابطہ کر سکتے ہیں۔
مزید پڑھیں
بورڈ آف پیس میں شمولیت پر پاکستان کی حمایت قابلِ ستائش: امریکی وزیرخارجہ
