عوام سے گیارہ روپے میں بجلی خرید کر چالیس روپے میں بیچنا کہاں کا انصاف ہے؟ علی ظفر

نیپرا کے فیصلے پر سخت ردعمل

پاکستان تحریک انصاف کے سینیٹر بیرسٹر علی ظفر نے نیپرا کے نیٹ بلنگ سے متعلق فیصلے کو عوام پر بم قرار دے دیا۔ انہوں نے کہا کہ عوام سے بجلی 11 روپے فی یونٹ میں خرید کر 40 روپے میں فروخت کرنا سراسر ناانصافی ہے۔

سولر صارفین سے کیا گیا وعدہ

علی ظفر کا کہنا تھا کہ عوام سے وعدہ کیا گیا تھا کہ سولر لگانے سے فائدہ ہوگا، اسی لیے لوگوں نے قرض لے کر لاکھوں روپے کے پینلز لگائے۔ اب یہ فیصلہ ان تمام صارفین کے ساتھ زیادتی کے مترادف ہے۔

حکومت اور نیپرا کی ذمہ داری

انہوں نے کہا کہ حکومت یہ کہہ کر بری الذمہ نہیں ہو سکتی کہ نیپرا آزاد ادارہ ہے، کیونکہ نیپرا وہی پالیسیاں بناتی ہے جن کی حکومت ہدایت دیتی ہے۔ ان کے مطابق آئی پی پیز کو بجلی پیدا کیے بغیر بھی ادائیگیاں کی جا رہی ہیں، جو عوام کے ساتھ ناانصافی ہے۔

سینیٹ میں جواب طلبی کا مطالبہ

پی ٹی آئی سینیٹر نے مطالبہ کیا کہ نیپرا کے چیئرمین کو سینیٹ میں بلایا جائے اور اگر حکومت واقعی بے بس ہے تو قانون سازی کرے۔ ان کا کہنا تھا کہ یہ فیصلہ براہ راست عوام پر بوجھ ڈالنے کے برابر ہے۔
مزید پڑھیں
بھارت کے خلاف نارمل میچ ہوگا، دو میچز کی جیت کا اعتماد: صاحبزادہ فرحان