پنجاب میں اسموگ اور دھند کے باعث حد نگاہ محدود، موٹروے سیکشنز بند
پنجاب کے مختلف شہروں میں شدید دھند اور اسموگ نے حد نگاہ کو کم کر دیا ہے- جس کے سبب ٹریفک کے لیے موٹرویز کے کچھ حصوں کو عارضی طور پر بند کر دیا گیا ہے۔ لاہور میں اسموگ کی صورتحال تشویشناک ہے، جہاں ایئر کوالٹی انڈیکس 600 کے قریب پہنچ چکا ہے۔
لاہور میں ایئر کوالٹی انڈیکس اور بند موٹروے سیکشنز
لاہور سمیت متعدد علاقوں میں اسموگ اور دھند کی شدت برقرار ہے۔ ایئر کوالٹی انڈیکس میں اضافے کے باعث موٹروے ایم ٹو (اسلام آباد تا لاہور) اور موٹروے ایم 4 کے پنڈی بھٹیاں سے عبدالحکیم سیکشن کو بھی ٹریفک کے لیے بند کیا گیا ہے۔ موٹروے حکام کا کہنا ہے کہ یہ اقدام مسافروں کی حفاظت کو یقینی بنانے کے لیے اٹھایا گیا ہے۔
شہریوں کے لیے سفری ہدایات
موٹروے پولیس نے شہریوں کو دن کے اوقات میں سفر کرنے کی ہدایت کی ہے، کیونکہ دھند کے موسم میں صبح 10 بجے سے شام 6 بجے تک کا وقت محفوظ سمجھا جاتا ہے۔ تیز رفتاری سے اجتناب کریں، اگلی گاڑی سے مناسب فاصلہ برقرار رکھیں، اور گاڑیوں میں فوگ لائٹس کا استعمال کریں تاکہ دوران سفر حفاظت ممکن ہو۔
سفر سے پہلے معلومات حاصل کریں
کسی بھی علاقے کا سفر شروع کرنے سے پہلے موٹروے پولیس کی ہیلپ لائن 130 سے معلومات لے سکتے ہیں۔ نیشنل ہائی ویز اینڈ موٹروے پولیس کے آفیشل سوشل میڈیا اکاؤنٹس پر بھی تازہ ترین معلومات فراہم کی جاتی ہیں، جن سے شہری موسمی صورتحال اور روڈ کلوزرز کے بارے میں آگاہی حاصل کر سکتے ہیں۔
