آج کل کے دھوکہ باز اور ان کی فراڈ کرنے کی جدید طریقے

نوسربازوں کی وارداتیں اور ان سے بچنے کے طریقے
آج کل کے معاشرتی حالات میں نوسر باز، فراڈیے اور چور اپنے چالاک طریقوں سے لوگوں کو بے وقوف بنا کر ان کی جائیداد اور پیسہ ہڑپنے کی کوششوں میں ملوث ہیں۔ ان کی وارداتوں میں جدت اور تیزی آ چکی ہے، اور ایسا محسوس ہوتا ہے کہ یہ اب کسی نہ کسی شکل میں ہماری زندگی کا حصہ بن چکے ہیں۔ یہاں ہم ان کے طریقہ واردات کو سمجھنے اور ان سے بچاؤ کے لیے ضروری احتیاطی تدابیر پر روشنی ڈالیں گے۔

دھوکہ دہی کی تعریف اور اس کی نوعیت
دھوکہ دہی کی تعریف وہ عمل ہے جس میں ایک شخص جان بوجھ کر غلط معلومات فراہم کرتا ہے تاکہ کسی دوسرے شخص کو نقصان پہنچا سکے یا غیر قانونی فائدہ حاصل کر سکے۔ فراڈیے عموماً اپنے جھوٹے دعووں سے لوگوں کو متاثر کرتے ہیں اور ان کی مالی حالت کو نقصان پہنچاتے ہیں۔ اب سوال یہ ہے کہ یہ لوگ آپ کے بارے میں کس طرح معلومات حاصل کرتے ہیں اور کس طریقے سے آپ کو نشانہ بناتے ہیں؟ نوسر بازوں کے پاس آپ کے بارے میں ابتدائی معلومات محدود ہوتی ہیں، مگر یہ افراد بڑی ہوشیاری سے آپ کی نفسیات کا تجزیہ کرتے ہیں اور آہستہ آہستہ آپ سے ضروری معلومات حاصل کرنے کی کوشش کرتے ہیں۔

نوسر بازوں کے طریقہ واردات
جب آپ سے بات چیت شروع ہوتی ہے، تو یہ فراڈیے سب سے پہلے آپ کا شناختی کارڈ نمبر اور دیگر ذاتی معلومات جیسے آپ کا پتہ اور فون نمبر بتا کر آپ کو یہ باور کرانے کی کوشش کرتے ہیں کہ وہ آپ کی اصل مالیاتی ادارے سے بات کر رہے ہیں۔ ان کی اگلی کوشش ہوتی ہے کہ آپ سے آپ کے اے ٹی ایم کارڈ کے آخری آٹھ نمبرز، پن نمبر، یا او ٹی پی (OTP) طلب کریں تاکہ وہ آپ کے اکاؤنٹ تک رسائی حاصل کر سکیں۔ یہ تمام معلومات آپ کے اکاؤنٹ کو محفوظ رکھنے کے لیے انتہائی اہم ہیں اور انہیں کسی غیر متعلقہ شخص کے ساتھ شیئر کرنا آپ کو نقصان میں ڈال سکتا ہے۔

نوسر بازوں کی جدید چالاکیاں اور ان سے بچاؤ
دھوکے بازوں کے طریقے صرف اتنے تک محدود نہیں ہیں۔ وہ آپ کو ایسے وقت پر کال کرتے ہیں جب آپ ذہنی طور پر پوری طرح بیدار نہیں ہوتے، جیسے صبح سویرے جب آپ دفتر جانے کی تیاری کر رہے ہوتے ہیں یا دوپہر کے وقت جب آپ آرام کر رہے ہوتے ہیں۔ اس کے علاوہ، وہ آپ کو ای میل یا واٹس ایپ کے ذریعے بھی جعلی پیغامات بھیج کر آپ کو الجھانے کی کوشش کرتے ہیں۔ یہ فراڈیے اکثر آپ کو اس طرح کے پیغامات بھیجتے ہیں جیسے “اسٹیٹ بینک نے آپ کا اے ٹی ایم کارڈ منجمد کر دیا ہے” یا “آپ کا اکاؤنٹ بلاک ہو گیا ہے”، جن کا حقیقت سے کوئی تعلق نہیں ہوتا۔ یہ صرف آپ کو گھبرا کر آپ کی ذاتی معلومات حاصل کرنے کے لیے ہوتے ہیں۔

پولیس انسپکٹر کا جعلی کردار اور کیسے بچا جائے
ایک اور عام فراڈ میں، ایک شخص خود کو پولیس انسپکٹر ظاہر کر کے آپ کو بتاتا ہے کہ آپ کے کسی عزیز کو کسی سنگین جرم میں ملوث ہونے کی وجہ سے گرفتار کر لیا گیا ہے۔ وہ آپ سے مسلسل رابطے میں رہنے کو کہتا ہے تاکہ آپ کی معلومات کو ایک پیچیدہ بہانے سے حاصل کیا جا سکے۔ آپ کو اس صورت میں فوراً کال کاٹ کر اپنی گھر والوں سے تصدیق کرنی چاہیے اور کسی بھی قسم کی گھبراہٹ میں آ کر فراڈیے کے چکر میں نہیں آنا چاہیے۔

دھوکہ دہی سے بچنے کے لیے احتیاطی تدابیر
دھوکہ دہی سے بچنے کے لیے کچھ احتیاطی تدابیر اختیار کرنا انتہائی ضروری ہیں۔ جب بھی آپ کو کسی غیر متعارف نمبر سے کال آئے، تو اس کا جائزہ لیں۔ عام طور پر نوسر بازوں کے نمبرز درست نہیں ہوتے اور یہ کسی حقیقی ادارے کے نمبر سے مشابہت رکھتے ہیں۔ اپنی ذاتی معلومات جیسے پن نمبر، او ٹی پی، یا شناختی معلومات کسی بھی اجنبی کو نہ دیں۔ اگر کوئی آپ کو دباؤ میں لانے کی کوشش کرتا ہے یا آپ سے فوری معلومات مانگتا ہے تو فوراً کال کاٹ کر متعلقہ ادارے سے تصدیق کریں۔

حواس کو قابو میں رکھیں اور فراڈیے کا مقابلہ کریں
دھوکہ دہی کے طریقے وقت کے ساتھ ترقی کر رہے ہیں، اور نوسر بازوں کے جدید حربے ان کے خطرے کو بڑھا رہے ہیں۔ ان سے بچنے کا بہترین طریقہ ہوشیاری اور احتیاط ہے۔ آپ کو اپنے حواس کو قابو میں رکھنا ہے اور ان سے سوالات کر کے ان کے جھوٹ کو بے نقاب کرنا ہے۔ جیسے کہ کہاوت ہے “ٹینشن لینے کا نہیں، دینے کا ہے۔
تحریر: سہیل یعقوب