واٹس ایپ کالز میں ایک نیا بگ، صارفین کو مشکلات کا سامنا
اینڈرائیڈ پر واٹس ایپ استعمال کرنے والے صارفین کو ایک نئے بگ کی وجہ سے مشکلات کا سامنا ہو رہا ہے، جس سے ان کی فون کالز متاثر ہو رہی ہیں۔ یہ بگ اس وقت فعال ہو جاتا ہے جب ایپ کو بند کیا جاتا ہے یا اسکرین خود بخود ڈِم ہو جاتی ہے۔ اس کا نتیجہ یہ ہوتا ہے کہ مائیکرو فون بند ہو جاتا ہے، جس کے باعث کال کے دوران آواز ختم ہو سکتی ہے۔
مسئلہ کا اثر اور صارفین کے تجربات
ٹیک ایشو ٹوڈے کی رپورٹ کے مطابق، واٹس ایپ صارفین نے مختلف آن لائن فورمز، جیسے ریڈ اِٹ، پر اس مسئلے کے بارے میں شکایت کی ہے۔ متاثرہ صارفین نے کہا کہ جب وہ واٹس ایپ کال کے دوران کسی دوسری ایپ کو استعمال کرتے ہیں یا اسکرین کو کچھ دیر کے لئے نظرانداز کرتے ہیں، تو کال میں خلل آنا شروع ہو جاتا ہے۔ خاص طور پر اگر اسپیکر آن ہوتا ہے، تو کال کا سلسلہ ٹوٹ سکتا ہے۔
ون پلس کمیونیٹی میں بھی اس بگ کی شکایت کی گئی تھی، جہاں ایک صارف نے بتایا کہ یہ مسئلہ 2019 سے جاری ہے۔ صارف نے مزید کہا کہ جب وہ واٹس ایپ کال پر ہوتے ہیں اور کسی دوسری ایپ پر منتقل ہوتے ہیں، تو ان کی آواز خود بخود بند ہو جاتی ہے۔ اس کے بعد جب دوبارہ واٹس ایپ پر واپس آتے ہیں، آواز بحال ہو جاتی ہے۔ اس کے علاوہ، جب اسکرین لاک ہو جاتی ہے، تو آواز دوسرے فریق کو نہیں پہنچتی جب تک اسکرین ان لاک کر کے ایپ پر واپس نہ جایا جائے۔
یہ مسئلہ واٹس ایپ کے استعمال میں ایک سنگین رکاوٹ بن گیا ہے، اور صارفین اس کے فوری حل کی توقع کر رہے ہیں۔
مزید پڑھیں
گوگل کا نیا فیچر: اے آئی کی مدد سے پانچ منٹ میں اپنی پسندیدہ خبریں سنیں
