پاکستان تحریک انصاف کا پارلیمانی کمیٹی اجلاس سے بائیکاٹ کا اعلان
پاکستان تحریک انصاف (پی ٹی آئی) نے چیف جسٹس آف پاکستان کی تقرری کے لیے بنائی گئی خصوصی پارلیمانی کمیٹی کے اجلاس سے مکمل طور پر الگ ہونے کا اعلان کر دیا ہے۔ اس کمیٹی کا اجلاس آج شام 4 بجے منعقد ہونے والا ہے۔
ڈان نیوز کے مطابق، پی ٹی آئی کی سیاسی کمیٹی کے اجلاس کے بعد جاری کیے گئے اعلامیہ میں کہا گیا ہے کہ پارٹی پالیسی کی خلاف ورزی کرتے ہوئے 26ویں آئینی ترمیم کے حق میں ووٹ دینے والے ارکان کے خلاف سخت کارروائی کی جائے گی۔
پارٹی پالیسی کی خلاف ورزی پر کارروائی کی منظوری
پی ٹی آئی کے اعلامیے میں مزید کہا گیا ہے کہ آئینی ترمیم کو ووٹ دینے والے ارکان کی بنیادی جماعتی رکنیت کو منسوخ کرنے کا فیصلہ کیا گیا ہے، اور ان کے خلاف تادیبی کارروائی پر اتفاق کیا گیا ہے۔ پارٹی سے روابط منقطع کرنے والے دیگر ارکان کو بھی شوکاز نوٹس جاری کرنے کی منظوری دی گئی ہے، اور ان کے جوابات کی بنیاد پر ان کے مستقبل کا فیصلہ کیا جائے گا۔
چیف جسٹس کی تقرری کا نیا طریقہ کار
یاد رہے کہ 21 اکتوبر کو قومی اسمبلی سے منظوری اور صدر مملکت کے دستخط کے بعد 26ویں آئینی ترمیمی بل قانون بن چکا ہے۔ اس قانون کے تحت چیف جسٹس آف پاکستان کی تقرری کا طریقہ کار تبدیل کر دیا گیا ہے۔ اب قومی اسمبلی اور سینیٹ کے ارکان پر مشتمل ایک کمیٹی سپریم کورٹ کے تین سینئر ترین ججوں میں سے ایک نام کو وزیراعظم کے لیے منتخب کرے گی، اور وزیراعظم اس نام کو صدر مملکت کی منظوری کے لیے بھیجیں گے۔
گزشتہ روز نئے قانون کے مطابق ایک خصوصی پارلیمانی کمیٹی تشکیل دی گئی تھی جس کا اجلاس آج شام 4 بجے پارلیمنٹ ہاؤس اسلام آباد میں منعقد ہو گا۔
